VOV4.Jarai - Ƀơi anăp pơplih dleh tơnap mơng klin ruă Covid-19 hăng amra tưp mut klin tui jơlan guai lŏn ia, khul ling tơhan pơgang guai lŏn ia hơdôm bôh tơring čar Dăp Kơdư hmâo pok pơhai khul ling tơhan, ngă tui bruă hyu tir, wai lăng, pơjing sa glông jơlan pơgang kơjăp phik amăng bruă pơgang, pơgăn klin.

Tơring čar Kontum lĕ tơring čar hmâo jơlan glông guai lŏn ia ataih hloh ƀơi kual Dăp Kơdư, hăng 292 km găn rơgao 13 bôh să, gah 4 bôh tơring glông, giăm hăng dêh čar Lao hăng Kur. Ră anai, khul ling tơhan pơgang guai lŏn ia tơring čar Kontum glăk djă pioh 66 bôh anih anom dô̆ gak, hăng djop mrô, ngă tui bruă wai lăng glông guai lŏn ia hrơi mlăm. Amăng lŏn ia, khul ling tơhan pơgang guai lŏn ia hyu lăi pơhing kơ mơnuih ƀôn sang dô̆ hơdĭp mơda, ngă đang hmua ƀơi kual giăm hăng guai lŏn ia nao mă bruă pơgang, pơgăn klin, hrom hăng anun gum hrom kơdŏng pơgăn mut tơbiă ƀu djơ̆ phiăn; lăi pơhing, pơtô pơhrăm mơnuih apăn bruă tơhan, ling tơhan ngă tui 5 mơta pơgang klin, gơgrong hlâo, amra mă bruă lom kiăng. Đại tá Lê Minh Chính, Khua git gai Ping gah, Gong gai Ling tơhan Puih kơđông pơgang guai lŏn ia tơring čar Kontum brơi thâo:

“Ƀing gơmơi djă pioh tơpă hơdôm anih dô̆ gak rôk tui glông guai lŏn ia, biă ñu hơdôm kual jum dar akiăng dua bơnah bah amăng guai lŏn ia hăng hơdôm jơlan amur, jơlan pok; gum hrom kơjăp hăng ling tơhan pơgang guai lŏn ia hăng khul tơhan plơi na nao mơng Ƀirô git gai ling tơhan tơring čar kơtưn nao djru gum tơdruă lom ngă tui bruă jao. Hrom hăng anun, ƀing gơmơi ăt črâo ba mơn ngă klă bruă lăi pơhing kơ mơnuih apăn bruă tơhan, ling tơhan hăng mơnuih ƀôn sang ƀơi kual guai lŏn ia kiăng djop mơnuih pơđĭ tui pran jua kơđiăng, ƀu lui raih amăng bruă pơgang pơgăn klin, ngă tui 5 mơta pơgang klin. Djop bruă găn nao rai leng kơ dưi pel ĕp, wai lăng kơjăp”.

Khul tơhan pơgang guai lŏn ia tơring čar Kontum lăi pơhing kơ mơnuih ƀôn sang kual guai lŏn ia nao pơgang klin hăng pơgăn mut tơbiă ƀu djơ̆ phiăn

Lom anai mơn, ngă tui bruă jao rôk tui 90 km glông jơlan ha mơguai hăng tơring čar Ratanakiri, dêh čar Kur, hăng 1 bah amăng guai lŏn ia hăng lu jơlan amur, pok jơlan, khul pơgang guai lŏn ia tơring čar Gialai ăt glăk djă pioh mơn 24 bôh anih anom dô̆ gak pơgang, pơgăn klin Covid-19 rôk tui guai lŏn ia. Hrom hăng anun lĕ 10 grŭp hyu tir mă bruă hrơi mlăm kiăng thâo, pơgăn bruă mut tơbiă ƀu djơ̆ phiăn.

Ƀơi bah amăng guai lŏn ia jar kơmar Lệ Thanh (tơring glông Đức Cơ), hăng jơlan gah pơdjai kơman lu rơwang, pơplih mơnuih mơgăt rơdêh, khul ling tơhan pơgang guai lŏn ia gum hrom hăng khul ling tơhan ia rơsĭ, ia jrao pơhlôm bruă dŭ pơgiăng gơnam tam. Amăng lŏn ia, hơdôm puih kơđông pơgang guai lŏn ia gum hrom hăng tha plơi, mơnuih hmâo arăng đăo gơnang lăi pơhing mơnuih ƀôn sang pơdơi hơdôm bruă hyu čuă gŏp djuai sang anô̆ ƀơi dua bơnah guai lŏn ia, hrom hăng anun ƀom bruă prah pơgang kơ tơlơi mut tơbiă ƀu djơ̆ phiăn. Đại úy Phan Thanh Hà, Kơ-iăng Khua Puih kơđông pơgang guai lŏn ia Ia O (Ƀirô git gai Ling tơhan pơgang guai lŏn ia tơring čar Gialai) glăk dô̆ mă bruă ƀơi tơring glông guai lŏn ia Ia Grai brơi thâo:

 “Puih kơđông pơgang guai lŏn ia Ia O glăk djă pioh anih dô̆ gak pơgang pơgăn mut tơbiă ƀu djơ̆ phiăn, sa anih pơgang, pơgăn klin Covid-19 hăng sa grŭp rô hyu; gum hrom hăng hơdôm bôh ƀirô, khul grŭp pơphun hyu tir, wai lăng kual guai lŏn ia, anih pioh kơđông gơgrong bruă, hmao tlôn thâo tơlơi mut tơbiă ƀu djơ̆ phiăn kiăng hmâo bruă pơgang pơhlôm hlâo klin ruă găn rơgao guai lŏn ia; lăng bruă mă mơng puih kơđông nao hlâo amăng pơgang, pơgăn klin hăng ngă tui tơpă tơlơi pơkă 5 mơta pơgang klin; mơnuih apăn bruă tơhan, ling tơhan djă pioh mrô, pơhlôm dô̆ gak prăp lui”.

Khul pơgang guai lŏn ia Dăp kơdư hmâo pơjing laih bruă pơgang pơgăn klin rôk tui hơdôm rơtuh rơwang km jơlan guai dêh čar 

Bơ̆ tơring čar Daklak hmâo glông jơlan guai lŏn ia ataih rơbêh kơ 74 km găn rơgao dua bôh tơring glông Ea Sup hăng tơring glông Ƀôn Đôn, giăm hăng tơring čar Mundulkiri, dêh čar Kur. Thượng tá Nguyễn Minh Tuyên – Kơ-iăng Khua git gai Ƀirô ling tơhan pơgang guai lŏn ia tơring čar Daklak ăt brơi thâo mơn, ră anai, hơdôm puih kơđông pơgang guai lŏn ia hmâo kơtưn bruă hyu tir, wai lăng, pơsit pran jua pơgăn khop bruă mut rai ƀu djơ̆ phiăn rôk tui 4 bôh să, gah 2 bôh tơring glông guai lŏn ia. Gơnang kơ pran jua gơgrong hlâo hăng ngă tui tơpă hơdôm bruă dô̆ gak, hyu tir, wai lăng mơ̆ hơdôm hrơi rơgao, khul pơgang guai lŏn ia hmâo thâo hăng pơgăn hmao tlôn hơdôm pluh čô mơnuih mut rai ƀu djơ̆ phiăn:

 “Amăng bơyan phang khôt, jơlan nao rai kơplah wah dua bơnah amuñ biă, ƀing gơmơi djă pioh anih dô̆ gak hơđong, 12 grŭp hyu tir pơhlôm bruă hyu tir hrơi mlăm, khom mă pơkŏng hơdôm mơnuih găn rơgao guai ƀu djơ̆ phiăn mơng dêh čar Kur rai pơ̆ Việt Nam. Ƀing gơmơi pơsur mơnuih ƀôn sang ngă tui tơpă hơdôm tơlơi pơkă ƀơi guai lŏn ia, ƀu găn rơgao nao rai guai lŏn ia, ngă tui tơpă hơdôm bruă pơgang, pơgăn klin, wai lăng kơjăp mơnuih mut tơbiă. Ƀơi ƀirô puih kơđông, ƀing gơmơi khom gôm adung mơbah, hăng ngă tui 5 mơta tơlơi pơgang, pơgăn klin mơng Ding jum ia jrao pơhlôm bruă pơgang pơhlôm klin kheng ba glăi bôh tơhnal klă”.

Hăng pran pơsit prong, hrom hăng lu jơlan pơsir hăng pran jua prăp lui, gơgrong hlâo, khul ling tơhan pơgang guai lŏn ia rôk tui hơdôm rơtuh rơwang km glông guai dêh čar ƀơi Dăp Kơdư glăk pơjing pơnăng war kơjăp, pơgăn klin Covid-19; ngă gal brơi klă hloh pioh hơdôm anih anom pơgang rah klin ruă, djă pioh rah hơdôm bruă bơwih ƀong – mơnuih mơnam./.

Siu H’ Prăk: Pô pơblang