VOV4.Jarai - Ƀơi anăp hơdôm tơlơi ngă dleh tơnap mơng klin Covid-19 lom dêh čar gơyut Kur glăk čih djă pioh mrô mơnuih ƀă kơman Covid-19 đĭ lu, tơring čar Mondulkiri, anih giăm hăng 2 bôh tơring glông Ea Sup hăng Ƀuôn Đôn tơring čar Daklak ăt hmâo čih pioh mơn mơnuih ƀă kơman Covid-19. Hăng pran jua ƀu pioh klin ruă lar hyu găn rơgao guai lŏn ia, hơdôm bôh Puih kơđông pơgang guai lŏn ia tơring čar Daklak djă pioh abih bang hơdôm grŭp dô̆ gak hăng mrô mơnuih mă bruă hyu tir, wai lăng anih dô̆ gak pơgăn ƀơi guai dêh čar. Hrom hăng anun kơtưn khul mơnuih, gơnam mă yua ƀơi anai, kual phun, dleh tơnap, hmao tlôn thâo, pơgăn khŏp bruă găn rơgao guai lŏn ia ƀu  djơ̆ phiăn.

Hăng sa čô mơnuih ƀơi anăp gum hrom amăng bruă hyu hơduah ĕp mơnuih bơdjơ̆ nao mơnuih djơ̆ kơman hăng pơgăn hmao tlôn 12 čô mơnuih găn rơgao guai lŏn ia ƀu djơ̆ phiăn rai mơng dêh čar Kur ƀơi guai lŏn ia gah tơring glông Ea Sup mlăm lơ 25/4 phrâo rơgao, Trung úy Cao Tiến Dũng, glăk dô̆ mă bruă ƀơi anih dô̆ gak pơgang pơgăn klin Covid-19 mơng puih kơđông pơgang guai lŏn ia Ia Rvê ruai glăi:

“Rơgao kơ dô̆ krăp lăng hăng dô̆ gak thâo hơdôm gru nam lĕ ta hyu hơduah ĕp kru hăng thâo hơdôm mơnuih mut nao dơlăm amăng lŏn ia lĕ lăi pơthâo glăi gum hrom hăng hơdôm khul grŭp ƀơi să kiăng pơgăn hăng ngă bruă čơlah đuăi hơbit hmao tlôn. Tơdah guai lŏn ia mơ̆ lui raih thơ bơdjơ̆ nao prong biă, anun ƀing ta khom lăng yôm pran jua kơđiăng, pơđĭ tui bruă mă hloh dong, pơgang pơgăn klin kah hăng pơgăn ayăt”.

Ling tơhan pơgang guai lŏn ia dô̆ gak pơgang pơgăn klin Covid-19 ƀơi bah amăng jang Dak Ruê

Tui hăng Đại úy Hoàng Văn Tuân, Kơ-iăng Khua Puih kơđông pơgang guai lŏn ia Ia Rvê, mơng lơ 25/4 truh ră anai, ƀơi hơdôm glông guai lŏn ia mơng tơring glông Ea Sup, ling tơhan Pơgang guai lŏn ia hmâo gum hrom laih hăng hơdôm khul pơgang guai lŏn ia hmao tlôn thâo hăng pơgăn 3 mơta tơlơi hăng 17 čô mơnuih găn rơgao guai lŏn ia ƀu djơ̆ phiăn. Pơsit pơ̆ anăp anai, tơlơi anai amra dô̆ ngă tơnap mơn, anun puih kơđông hmâo pơtrut pơsur adơi ayong găn rơgao hơdôm tơlơi tơnap, tơlơi gun kơ ayuh hyiăng, jơlan nao rai kiăng ngă klă bruă jao mơng pô hăng pran pơsit pơhlôm klă, hơđong hăng rơnuk rơnua ƀơi anih guai lŏn ia:

“Khul ling tơhan mơng puih kơđông ƀiă mơ̆, mơnuih mut tơbiă nao rai gah rơngiao kơ mông mă bruă čar hăng tơlơi ayuh hyiăng ăt kah hăng jơlan nao rai mă bruă amăng bơyan phang, anih anom lŏn dăo, lŏn krô kreñ, mơnuih ƀôn sang mă tŭ tơlơi anun mơ̆ mut tơbiă, ƀu hmâo glông jơlan rơđah mơ̆ raih daih ƀơi guai lŏn ia. Ƀơi anăp tơlơi tơnap anun, Grŭp črâo ba anom hmâo pơpha rơđah dô̆ gak ƀơi guai lŏn ia hăng pơplih nao rai dô̆ gak pơpha rim grŭp ling tơhan hyu mă bruă kiăng pơplih nao rai ngă tui bruă jao ƀơi guai lŏn ia kiăng wai lăng klă hloh”.

Dô̆ gak ƀơi puih kơđông Ia Rvê    

Bơ̆ ƀơi anih gak pơgang pơgăn klin Covid-19 mơng Puih kơđông pơgang gai ƀơi bah amăng jang lŏn ia pơ̆ Dak Ruê, bruă hyu tir, wai lăng ăt dưi hmâo puih kơđông đing nao prong mơn, Trung tá Phùng Văn Bình, mơnuih mă bruă ƀơi Anom bruă ia jrao khul ling tơhan pơgang guai lŏn ia Dak Ruê brơi thâo:

“Adơi ayong ƀơi anai hyu tir ƀơi guai lŏn ia pơgăn nao mă bruă pơgang pơgăn klin ruă. Tơdah hmâo hlơi găn ča guai lŏn ia thơ adơi ayong hyu tir hơgom ba nao pơ̆ anih čơlah đuăi mơng puih kơđong. Adơi ayong ƀơi anih dô̆ gak ƀơi anai hăng adơi ayong amăng puih kơđông hăng pran jua pơgang pơgăn klin ruă prong hloh, ƀu pioh klin tưp mut amăng kual guai lŏn ia”.

Thượng tá Nguyễn Minh Tuyên, Kơ-iăng Khua git gai Ling tơhan pơgang guai lŏn ia tơring čar Daklak, brơi thâo: Ƀơi đơ đam glông guai lŏn ia ataih rơbêh kơ 73 km giăm hăng tơring čar Mondulkiri, dêh čar Kur, hơdôm puih kơđông pơgang guai lŏn ia hmâo kơtưn hyu tir, wai lăng, pơsit pran jua pơgăn khop kiăng bruă mut tơbiă ƀu djơ̆ phiăn ƀơi guai lŏn ia. Hrom hăng anun, hơdôm bôh puih kơđông ƀơi anăp gum hrom kơjăp hăng gưl ping gah, gong gai plơi pla, biă ñu ƀơi 4 bôh să guai lŏn ia gah hơdôm bôh tơring glông Ea Sup hăng Ƀuôn Đôn, pơtrut kơtang bruă lăi pơhing, pơđĭ tui tơlơi pơmin, bôh thâo, jơlan gah bruă kơ mơnuih ƀôn sang amăng bruă pơgang pơgăn klin Covid-19.

“Puih kơđông hmâo pok pơhai djă pioh 6 anih anom dô̆ gak hơđong, 18 grŭp hyu tir kơtưn đĭ gơnam mă yua, pơtrut pơsur mơnuih apăn bruă tơhan, ling tơhan hyu tir wai lăng hrơi mlăm pơhlôm guai lŏn ia, kơjăp hăng pran pơsit ƀu pioh hlơi găn rơgao guai lŏn ia mơng dêh čar Kur rai mơ̆ ƀu hmâo tơlơi wai lăng”.

Găn rơgao tơlơi tơnap, dleh glar ƀơi anih guai lŏn ia tơnap tap, rim mơnuih apăn bruă tơhan, ling tơhan pơgang guai lŏn ia tơring čar Daklak leng kơ thâo pran pơsit ƀu pioh klin ruă Covid-19 tư̆p mut amăng kual./.

Nam Trang: Pô čih – Siu H’ Prăk: Pô pơblang