VOV4.Jarai - “Hơdôm bôh tơring čar, ƀôn prong ƀu lui raih, gơgrong hlâo prăp lui hơdôm bruă lom hmâo klin Covid-19 hmâo ƀơi plơi pla pô”. Anai lĕ tơlơi lăi rơđah mơng Khua ding jum ia jrao ơi Nguyễn Thanh Long amăng mông Jơnum lăng nao rai amăng tivi “Kơtưn bruă pơgang, pơgăn klin Covid-19” hăng 63 bôh tơring čar, ƀôn prong pơphun amăng mơguah lơ 16/4. Pơhiăp amăng mông pok phun jơnum, Khua ding jum ia jrao ơi Nguyễn Thanh Long lăi rơđah: Tơlơi klin Covid-19 ăt ngă glêh tơnap mơn ƀơi rŏng lŏn tơnah, bruă wai lăng klin ruă amăng thun anai lĕ tơlơi lông prong hăng hơdôm bôh dêh čar hăng đơ đam dêh čar Việt Nam. Tui hăng Khua ding jum ia jrao, dêh čar ta găn rơgao 3 tal klin ngă, truh mông anai hmâo laih 21 hrơi dêh čar ta ƀu hmâo mơnuih ƀă kơman Covid-19 amăng plơi pla, hơdôm bruă mă mơng mơnuih ƀôn sang kah hăng pơwot glăi kah hăng tơđar laih. Mơng hơdôm tal klin ruă hmâo thâo kiăng wai lăng klă klin Covih-19. Khua ding jum ia jrao ơi Nguyễn Thanh Long lăi rơđah: kual hang rơngiă hloh ră anai lĕ guai lŏn ia gah Dơnung Yŭ hăng hơdôm bôh tơring čar kual Yŭ Dơnung dêh čar. Yua anun, hơdôm bôh tơring čar, ƀôn prong khom kơtưn wai lăng jơlan guai lŏn ia. Ding jum ia jrao dêh čar hmâo gum hrom laih hăng Ding jum khul ling tơhan kơtưn hơdôm khul ling tơhan dô̆ gak ƀơi hơdôm anih dô̆ gak pơ̆ guai lŏn ia./.

Siu H’ Prăk: Pô pơblang