VOV4.Jarai - Ƀơi anăp tơlơi pơhŭi mơng klin Covid-19, truh mơguah tom brơi lơ 4/5, dêh čar ta hơmâo laih 9 boh tơring čar, ƀon prong brơi čơđai sang hră pơdơi nao sang hră truh hrơi hơmâo tơlơi lăi glăi phrâo. Anun lĕ ƀon prong Hà Nội, Bắc Giang, Hà Nam, Vĩnh Phúc, Hưng Yên, Yên Bái, Đà Nẵng, Quảng Nam, An Giang. Kiăng pơhlôm bruă hrăm hră, bruă pơtô hăng hrăm amra lăng nao rai amăng tivi, hrăm amăng internet. Ƀơi tơring čar Vĩnh Phúc, anih hơmâo klin Covid-19 glăk kơtang, kiăng pơhlôm rơnuk rơnua kơ ƀing čơđai, Jơnum min mơnuih ƀon sang tơring čar brơi rơbêh 300.000 čô čơđai sang hră mơng anih muai truh gưl 3, sang hră pơtô hrăm giáo dục thường xuyên hăng sang hră pơtô bruă mă ƀơi tơring čar pơdơi nao sang hră mơng lơ 3/5 truh lơ 8/5. Tơdơi mông anai, tui hluai kơ klin tơdu hă kơtang mơn, Jơnum min mơnuih ƀon sang tơring čar amra sem lăng, git gai lăp djơ̆. Ƀơi tơring čar Hưng Yên, Gơnong bruă pơtô hăng pơhrăm bruă tơring čar rơkâo kiăng Jơnum min mơnuih ƀon sang tơring čar brơi ƀing čơđai amăng tơring čar pơdơi mơng lơ 4/5 truh hrơi hơmâo tơlơi lăi glăi phrâo, pioh pơgang, pơgăn klin Covid-19.

Siu H’Mai: Pơblang