VOV4.Jarai-Mơguah lơ 22/4, Anom pơtô bruă ping gah dêh čar mă bruă hăng khua mua git gai ping gah tơring čar Quảng Bình kơ akŏ bruă pơphun jơnum hơdor glăi tal 110 thun hrơi tơkeng kơ rơgom ơi Võ Nguyên Giáp lơ 25/8 gưl dêh čar pơphun ƀơi Quảng Bình.

Tui hăng akŏ bruă, tơring čar Quảng Bình ngă hrom hăng djop ding jum, anom bruă gơnong dlông pơphun jơnum hơdor glăi tal 110 thun hrơi tơkeng kơ rơgom ơi Võ Nguyên Giáp; Jơnum bơkơtuai boh thâo ia rơgơi gưl dêh čar lăi nao hơdor glăi 110 thun hrơi tơkeng kơ rơgom ơi Võ Nguyên Giáp.

Ơi Vũ Đại Thắng, Khua git gai ping gah tơring čar Quảng Bình brơi thâo, hơdor glăi 110 thun hrơi tơkeng kơ rơgom ơi Võ Nguyên Giáp jing mông pơpŭ hăng hơdor tơngia kơ hơdôm bruă mă, pran jua prong prin mơ̆ng Khua tơhan krên dên ơi Võ Nguyên Giáp amăng bruă tơgŭ hơkrŭ pơklaih rơngai djuai ania, man pơdong dêh čar; čih pioh hơdor tơngia yom pơphăn, tơlơi pơđing ba mơ̆ng Khua tơhan krên dên hăng mơnuih ƀôn sang amăng dêh čar lăi hrom laih anun mơnuih ƀôn sang tơring čar Quảng Bình hnun mơ̆n.

Nay Jek: Pơblang