VOV4.Jarai - Hơdor glăi 114 thun hrơi tơkeng Khua git gai Ping gah dêh čar Lê Duẩn (7/4/1907 – 7/4/2021), mơguah tom brơi (5/4), Ping gah plơi prong Đông Hà, tơring čar Quảng Trị pơphun ngă lơphet pơpŭ bơnga Gŏng kut Khua git gai Ping gah dêh čar Lê Duẩn. Amăng mông ngă lơphet, khua git gai Ping gah plơi prong Đông Hà hrom hăng mơnuih apăn bruă, mơnuih mă bruă čar, mơnuih mă bruă pơkon ƀơi plơi prong lok glăi tơlơi hơdĭp mơda, kơnung djuai, bruă mă hơkrŭ ư-ang mơng Khua git gai Ping gah Lê Duẩn. Pran jua tơpă sit pơpŭ bơnga ƀơi anăp gŏng kut rơgom ơi Lê Duẩn, ƀing khua pơ ala pơdah pran jua thâo tơngia dơlăm hăng khua git gai Ping gah rơgơi kơhnâu mơng bruă hơkrŭ Việt Nam, cơđai rơgơi mơng Khua mir sir Hồ Chí Minh, pô ană mơbruă mơng plơi pla Quảng Trị hmâo tuh rơyuh prong prin laih kơ bruă tlaih rơngai djuai ania, pơlir hơbit lŏn ia. Tal anai, Khua git gai Ping gah plơi prong, Jơnum min pơ ala mơnuih ƀôn sang, Jơnum min mơnuih ƀôn sang, Jơnum min djop djuai ania mơnuih mơnam dêh čar Việt Nam plơi prong Đông Hà hrom hăng ƀing apăn bruă, mơnuih mă bruă čar, mơnuih mă bruă pơkon pơdah pran jua pơsit ngă tui pran jua gum hrom hơbit, hrăm tui hăng ngă tui gru hiam pran jua Hồ Chí Minh./.

Siu H’ Prăk: Pô pơblang