VOV4.Jarai - Mơguah lơ 28/4, ƀơi Hà Nội, Phun akha wai lăng khul mut phung dêh čar Việt Nam pơphun ngă Lơphet hơdor glăi 135 thun Hrơi Jar kơmar pioh kơ mơnuih mă bruă (1/5/1886 – 1/5/2021), Pơphun Blan mơnuih mă bruă. Pơhiăp amăng mông ngă lơphet, Khua mir sir dêh čar ta ơi Nguyễn Xuân Phúc lăi rơđah, Kơnuk kơna hăng mơnuih ƀôn sang ta pioh na nao kơ tơlơi lăng ba, bơwih brơi pha ra kơ mơnuih mă bruă hăng khul mut phung. Khua mir sir dêh čar ta bơni hơdôm gưl khul mut phung hmâo ngă tui tơpă laih tơlơi črâo ba mơng Grŭp git gai gir run na nao, pơčeh phrâo pok pơhai hơdôm bruă mă tŭ yua kiăng giăm truh 10 thun rơgao Blan mơnuih mă bruă sit nik jing hơdôm hrơi jơnum ngui mơnuih mă bruă gah sang măi, mơnuih mă bruă čar, mơnuih mă bruă đơ đam dêh čar ta. Hluai tui pran jua anun, Khua mir sir dêh čar ta rơkâo Khul mut phung tañ pơdŏng jơlan hơdră bruă mă mơng Khul mut phung Việt Nam ngă tui Tơlơi pơtrun pơsit Jơnum tal 13 mơng Ping gah pơhlôm akô̆ tlôn rơđah, dưi ngă. Amăng mông ngă lơphet, pơ ala kơ Grŭp črâo ba blan mă bruă kơ pơhlôm, hơdjă bruă mă mơng Kơnuk kơna, Khua Ding jum wai lăng mơnuih mă bruă tơhan rơka ruă hăng mơnuih mơnam dêh čar ơi Đào Ngọc Dung pơphun Blan mă bruă kơ pơhlôm, hơdjă amăng bruă mă thun 2021 hăng akô̆ ñu “Kơtưn pơsit, pel ĕp hơdôm tơhnal gal, tơlơi ƀu phă gah pơhlôm, hơdjă bruă mă hăng gum hrom mơng pơhlôm kơ mơnuih mă bruă”./.

Siu H’ Prăk: Pô pơblang