VOV4.Jarai - Tơlơi čang rơmang “hră pơsit hmâo yua vaccine” kiăng prăp lui čơkă tuai jar kơmar amăng tơlơi mơ-ak klă, Ding jum wai lăng bơkơjăp drơi jăn – bôh thâo hăng tuai čuă ngui glăk črâo ba Phun akha wai lăng tuai čuă ngui dêh čar mă bruă hăng hơdôm bôh anom bơdjơ̆ nao, khul tuai čuă ngui, anom bơwih ƀong pơdŏng pơjing tơhnal mă yua kiăng wai lăng tuai čuă ngui. Pơkă hlâo mơng ră anai truh rơnuč blan 4, Ding jum anai amra lăi pơthâo glăi kơ Khua dêh čar hơdôm tơlơi bơdjơ̆ nao. Kiăo tui anun, Phun akha wai lăng tuai čuă ngui dêh čar glăk kơsem min, prăp lui amăng ƀrư̆ pơphô hlâo ruah mă sa dua anih anom gơnam tam kiăng mă yua hră pơsit hmâo mă yua vaccine, ngă gal brơi tơlơi čơkă tuai hrom hăng anun pơhlôm pơgang pơgăn klin ruă. Khă hnun hai, tơlơi ba tơbiă pok bah amăng čơkă tuai jar kơmar khom dưi pơdŏng tui glông hơdră, hmâo črăn pơphô hlâo hăng pơhlôm klin ruă dưi đing nao hlâo. Mơng blan 4/2020 truh ră anai, Việt Nam pơdơi hơdôm jơlan por pơgiăng tuai jar kơmar, anun mrô tuai mơng gah rơngiao rai biă ñu ƀing juăt bruă, mơnuih mă bruă gah măi mok yôm, mơnuih tuh pơplai... dêh čar tač rơngiao mă bruă ƀơi hơdôm rơwang bruă ƀơi Việt Nam./.

Siu H’ Prăk: Pô pơblang