VOV4.Jarai - Khua dêh čar ta phrâo pơtrun hră Kông điên 479/CĐ-TTg kơ bruă bơwih brơi mơnuih ƀon sang nao rai hăng pơhlôm rơnuk rơnua ƀơi jơlan amăng hrơi ngă lơphet lơ 30/4 hăng lơ 1/5/2021. Hră pơtrun lăi rơđah, hrơi ngă lơphet lơ 30/4 hăng lơ 1/5, Khua dêh čar git gai hơdôm Ding jum, anom bruă; hơdôm boh tơring čar, ƀon prong amăng bruă gơñu gơgrong khŏm pơhlôm anŏ klă, rơnuk rơnua hăng bruă pơgiăng tuai; ngă tui djơ̆ tơlơi phiăn rơnuk rơnua jơlan nao rai; pơhlôm hơđong, rơnuk rơnua ƀơi hơdôm glông jơlan prong, hơdôm anih arăng juăt blơi gơnam, anih ngui ngor, mơñum ƀong hăng hơdôm anih tuai hyu ngui, anih pơphun tơlơi ngui ngor prong. Lăi pơthâo mrô telephôn iâu ječ pơhlôm rơnuk rơnua jơlan nao rai mơng hơdôm anom bruă gơnong dlông, mơng rim tơring čar kiăng hmư̆ tơlơi lăi glăi mơng mơnuih ƀon sang kơ tơlơi rơnuk rơnua ƀơi jơlan nao rai amăng hrơi pơdơi; pơhlôm dŏ gak hrơi mlăm mơtăm đah mơng hmư̆ tơlơi pơhing, pơsir bruă, pơsir hĭ hmao tlôn hơdôm bruă ƀu thâo hlâo...

Siu H’Mai: Pơblang