VOV4.Jarai - Amăng mông pơhiăp telephôn hăng Khua mir sir dêh čar ta ơi Nguyễn Xuân Phúc amăng tlam lơ 11/5, Khua dêh čar Japan ơi Suga Yoshihide pơ ala brơi Kơnuk kơna hăng mơnuih ƀon sang Japan pơpŭ Khua mir sir dêh čar ta ơi Nguyễn Xuân Phúc hơmâo Khua pơ ala mơnuih ƀon sang dêh čar dong yua ruah đĭ ngă khua mir sir dêh čar Việt Nam; laih dong pơsit tong Japan lêng kơ lăng yôm hăng amra tŏ tui ngă hrŏm kjăp dong, djru brơi Việt Nam pơđĭ kyar lŏn ia.

Hăng pran jua anun, Kơnuk kơna Japan pơsit djru ƀu kiăng mă glăi boh thâo ngă rơ-ơ̆ vaccine nua ñu 200 klăk Yên, laih dong jao ƀattô kơsem min amăng kual ia rơsĭ hăng Japan amra pok Sang anih jưh pơ ƀôn prong Đà Nẵng  thun pơ anăp anai. Khua mir sir dêh čar ta ơi Nguyễn Xuân Phúc pơsit tong, amăng tui tơlơi pơsit amăng bruă pơtom hiăp mơng Jơnum ruah khua Ping gah tal 13, Việt Nam lêng kơ lăng yôm dêh čar Japan lĕ dêh čar ngă hrŏm akŏ phun hăng sui thun pơ anăp. Ƀrô tal anai, Khua mir sir dêh čar ta ơi Nguyễn Xuân Phúc abih pran jua jak iâu ơi pơtao dêh čar Japan hăng bơnai ñu rai čuă dêh čar Việt Nam

Siu Đoan: Pơblang