VOV4.Jarai - Kiăng pơgang pơhlôm hlâo klin Covid-19, lơ 26/4, Grup ngă bruă mơng Anom bruă Hơdjă agaih anih anom Klin duam ruă kual Dap Kơdư nao čuă hăng ngă bruă tom puih hơđong tơhan pơgang guai pơgang klin Covid-19 ƀơi tơring glông Ea Súp, tơring čar Dak Lak. Tơring glông Ea Súp hơmâo năng ai 27km jơlan guai hăng dêh čar Kur, ƀơi anai hơmâo 4 puih kơđông tơhan pơgang guai glăk hyu tir, wai pơgang guai lŏn ia.

Hơduah ĕp bruă pơgang klin ƀơi puih kơđông tơhan 739.

Hơduah ĕp bruă pơgang klin ƀơi puih kơđông pơgang guai Ia Rvê.

Nao čuă hăng ngă bruă tom hơdôm puih kơđông tơhan pơgang guai Ea Súp, ơi Viên Chinh Chiến, Khua Anom bruă Hơdjă agaih anih anom Klin duam ruă kual Dap Kơdư bơni biă bruă pơgang klin Covid-19 mơng ƀing khua, ƀing tơhan pơgang guai. Ñu lăi, klin Covid-19 glăk kơtang biă ƀơi rŏng lŏn tơnah, lăp đing nao lĕ ƀơi dêh čar Kur, dêh čar hơmâo jơlan guai hăng Việt Nam, tơhan pơgang klin khŏm ngă hrŏm kơjăp, kơđiăng kơ bruă, đah mơng dưi pơgăn glăi tañ ƀing mut nao rai ča čot amăng dêh čar ta.

Siu H’Mai: Pơblang