VOV4.Jarai - Amăng mông jơnum lăng nao rai amăng tivi čơtlăm lơ 16/5 ƀơi ƀirô mă bruă Kơnuk kơna kơplah wah Jơnum min črâo bruă mơng lŏn ia ta hăng tơring čar Bắc Giang hăng Bắc Ninh – 2 tơring čar gluh đĭ klin Covid-19 kơtang hloh brơi ƀuh wot dua bôh tơring čar leng kơ čih pioh dong hơdôm pluh čô mơnuih ƀă kơman Sars-CoV-2. Git gai mông jơnum, Kơ-iăng Khua dêh čar ta ơi Vũ Đức Đam, Khua Grŭp črâo bruă brơi thâo amăng sa hrơi mlăm pơ̆ anăp amra pơjing glông jơlan lăi pơthâo ječ kiăng tŭ mă tơlơi lăi pơthâo gah tơlơi suaih pral mơng mơnuih ƀôn sang amăng tơlơi kiăng ječ. Bôh tơhnal bruă jơnum, Kơ-iăng Khua dêh čar ta ơi Vũ Đức Đam, lăi rơđah klin lar hyu tañ ƀơi Bắc Giang lĕ yua kơ anô̆ pha ra mơng kual sang măi lu mơnuih, mă bruă amăng sang gôm sir klep hăng tơlơi pơplih mơng kơman klin lar hyu tañ. Kơ-iăng Khua dêh čar ta lăi rơđah, kiăng ngă tui tơhnal dua mơta bruă, kơnong kơ guang dar kual hăng hơdôm anih anom amra ƀă kơman prong samơ̆ ră anai hmâo anih wai lăng ƀu kơjăp kual guang dar, kiăng pơkra glăi bruă anai. Grŭp črâo ba mơng lŏn ia ta pơpha rim ding kơna lăng tui hơdôm anih anom kiăng lăng tui bruă ngă tui tơlơi anai./.

Siu H’ Prăk: Pô pơblang