VOV4.Jarai - Jơnum jao glăi bruă mă kơplah wah Khua git gai Ping gah ơi Nguyễn Phú Trọng, Khua mir sir hơđăp hăng ơi Nguyễn Xuân Phúc, Ding kơna Ding jum kơđi čar, Khua mir sir phrâo hơmâo ruah phrâo pơphun yôm ƀơi Sang bruă Khua mir sir. Lăng glăi 2 thun ha mơkrah ngă Khua mir sir, amăng hrơi mông hơmâo lu tơlơi tơnap tap, hơmâo tơket tơkeng bruă kiăng pơsir, Khua git gai lăng glăi ñu hơmâo lu tơlơi gir run ngă djŏp bruă, ngă tŭ yua djŏp bruă hơmâo jao tui tơlơi phiăn. Ƀrô hrơi anai, Khua git gai Ping gah dêh čar ta bơni kơ Kơ-iăng khua mir sir hơđăp yă Đặng Thị Ngọc Thịnh, hơmâo ngă truh kih djŏp bruă hơmâo jao. Khua git gai Ping gah đăo gơnang, hăng tơlơi gơgrong bruă prong, Khua mir sir phrâo ơi Nguyễn Xuân Phúc hăng Kơ-iăng khua mir sir yă Võ Thị Ánh Xuân amra tañ juăt hăng bruă phrâo, hơmâo tơlơi git gai klă, lăp djơ̆, hmao tlôn, tŭ yua kiăng Anom bruă Khua mir sir pơtrut tui dong pran jua gum pơgôp, gum hrŏm ha pran, pơplih phrâo tŭ yua, akŏ pơjing Ping gah hăng anom bruă kơnuk kơna kơjăp kơtang, ngă truh kih djŏp bruă hơmâo jao.

Khua git gai Ping gah ơi Nguyễn Phú Trọng hăng Khua mir sir ơi Nguyễn Xuân Phúc hrŏm hăng khua mua, khua hơđăp Ping gah, Kơnuk kơna nap pơhmư̆ mông jao glăi bruă.

Siu H’Mai: Pơblang