VOV4.Jarai-Kơtưn pel ĕp hăng hruă kjăp bruă mut rai pơ Việt Nam, pơgăn ngă ƀiă hloh anŏ ƀă klin Covid 19 mơ̆ng tač rơngiao rai pơ dêh čar ta. Anun lĕ sa amăng hơdôm bruă mă ječ ameč ƀơi mông jơnum mơguah lơ 14/4 mơ̆ Khua mua git gai mơ̆ng dêh čar pơtrun hiăp djop anom bruă hăng djop tơring čar, ƀôn prong khom ngă.

Kơ-iăng Khua dêh čar ơi Vũ Đức Đam, Khua Khul git gai mơ̆ng dêh čar pơhlôm pơgang Covid 19 pô git gai jơnum. Khua mua phun git gai mơ̆ng dêh čar hơmâo pơtong rơđah, klin Covid 19 hlăk ƀă hyu tơnap tap biă mă ƀơi lu dêh čar amăng kual kah hăng dêh čar Kur, Thai Lan, Malaysia…bơbeč truh kơ bruă pơhlôm pơgang klin amăng dêh čar ta.

Truh mông anai, kiăng pơtum abih tơlơi thâo, anŏ kơtang bong glăi hăng klin yua dah pơ anăp anai hrơi pơdơi lơphet lơ 30/4 hăng lơ 1/5, mơnuih ƀôn sang kiăng rô nao rai lu biă mă. Tui hăng Thượng tướng ơi Nguyễn Văn Sơn, Kơ-iăng Khua ding jum kông an, khom pơgăn kơtang hloh djop mơnuih mut rai pơ Việt Nam, lir hơbit hăng bruă mă mơ̆ng Jơnum min mơnuih ƀôn sang djop tơring čar, ƀôn prong, biă mă ñu hăng ƀing mơnuih hơmâo ƀing ngă bruă sĭ mơdrô rơkâo brơi rai.

Kơ-iăng khua dêh čar ơi Vũ Đức Đam lăi pơtong, ăt ngă tui khut khăt, pơsir ngă kơtang hloh hơdôm ƀing rong mut rai ča čot amăng dêh čar ta.

Nay Jek: Pơblang