VOV4.Jarai - Amăng čơtlăm lơ 27/4, gah yŭ tơlơi git gai mơng Khua git gai wai lăng pơ ala mơnuih ƀôn sang dêh čar ta ơi Vương Đình Huệ, Jơnum min apăn bruă Khua pơ ala mơnuih ƀôn sang dêh čar ta hmâo pơsit pel ĕp tơlơi rơkâo mơng Kơnuk kơna, brơi mă yua 12 klai 100 klăk prăk pơkrem mă yua mơng ngăn drăp kơnuk kơna pioh blơi vaccine pơgang Covid-19. Bruă mă yua prăk anai pioh blơi vaccine pơgang Covid-19 lĕ kiăng biă, pơhlôm ngă tui hơdră bruă hơđong tơlơi hơdĭp mơda mơnuih mơnam tui tơlơi pơkă amăng Tơlơi phiăn ngăn drăp kơnuk kơna. Kơnuk kơna hmâo yap laih ngăn rơnoh hăng prăk mă yua djơ̆ hơdră hăng hmâo gru than. Khă hnun hai, Jơnum min apăn bruă Khua pơ ala mơnuih ƀôn sang dêh čar ta ăt đing nao mơn djru brơi kơ hơdôm tơring čar, ƀôn prong tơnap tap amăng ngă dưm kơnar ngăn drăp djơ̆ hơdră hăng rơnoh blơi hăng mă yua vaccine. Pơhiăp amăng mông pơđut jơnum tal 55, Khua git gai wai lăng pơ ala mơnuih ƀôn sang dêh čar ta ơi Vương Đình Huệ rơkâo hơdôm bôh  ƀirô prăp lui tŏng ten hơdôm tơlơi lăi pơthâo glăi amăng tal jơnum lok sa, Khua pơ ala mơnuih ƀôn sang dêh čar ta tal 15 mă bruă amăng 11 hrơi; pok phun amăng lơ 20-7 hăng pơđut amăng lơ 3/8. Amăng tal jơnum anai, Khua pơ ala mơnuih ƀôn sang dêh čar ta amra pioh lu mông pel ĕp, pơsit kơ tơlơi mơnuih mă bruă./.

Siu H’ Prăk: Pô pơblang