VOV4.Jarai - Ƀrô djơ̆ tal jơnum Khua yang hơdip glăi thun 2021, ơi Võ Ngọc Hiệp – Ding kơna Jơnum min apăn bruă Ping gah tơring čar – Khua Jơnum min djop djuai ania mơnuih mơnam dêh čar Việt Nam tơring čar Lâm Đồng hrom hăng ƀing ding kơna amăng  Jơnum min djop djuai ania mơnuih mơnam dêh čar Việt Nam tơring čar hmâo nao čuă hơdôm khul grŭp, khua apăn bruă khul đăo khôp, đăo phrâo hiam amăng plơi prong Đà Lạt. Grŭp hmâo nao čuă Sang jưh ama wai lăng khul đăo Đà Lạt, Sang jơnum khul đăo phrâo hiam Việt Nam (kual dơnung dêh čar). Ƀơi hơdôm anih nao čuă, Khua Jơnum min djop djuai ania mơnuih mơnam dêh čar Việt Nam tơring čar ơi Võ Ngọc Hiệp hmâo mơ-ĭt tơlơi hơ-ư̆č hmưi truh ƀing apăn bruă đăo, neh wa tui đăo ƀrô djơ̆ tal Jơnum pioh kơ Khua yang tơgŭ hơdip glăi thun 2021. Hrom hăng anun čang rơmang ƀing apăn bruă đăo hăng neh wa tui đăo gum hrom klă dong bruă bơkơtưn khăp kơ lŏn ia, hrom hăng mơnuih ƀôn sang pơdŏng plơi pla jai hrơi jai pơđĭ kyar./.

Siu H’ Prăk: Pô pơblang