VOV4.Jarai-Grup nao ĕp lăng mơ̆ng Jơnum min git gai phun pơ ala mơnuih ƀôn sang dêh čar, Khul pơphun ruah khua dêh čar, yua kơ khua tơhan krên dên ơi Tô Lâm, ding kơna Ding jum kơđi čar, Khua ding jum kông an, ding kơna Khul pơphun ruah khua dêh čar ngă khua grup nao sem lăng, ĕp glăi bruă prăp lui ruah khua pơ ala mơnuih ƀôn sang dêh čar ƀơi Đà Nẵng tal XV hăng ruah ƀing pơ ala mơnuih ƀôn sang djop gưl ƀơi Đà Nẵng.

Grup nao sem lăng, ĕp glăi mơ̆ng Jơnum min git gai pơ ala Khul pơphun ruah khua dêh čar ĕp lăng bruă mă prăp lui ruah khua ƀơi Đà Nẵng

Ngă tui Hră pơtrun mrô 119 mơ̆ng Khua pơ ala mơnuih ƀôn sang dêh čar kơ bruă ngă lăng hlâo ruah khua gong gai kơnuk kơna plơi prong hăng hơdôm tơlơi phiăn, jơlan hơdră phara pioh pơtrut Đà Nẵng pơđĭ kyar, rơwang bruă anai, ƀôn prong Đà Nẵng ƀu pơphun ôh bruă ruah khua ƀing pơ ala mơnuih ƀôn sang gưl kuân, phường, kơnong ruah ƀing pơ ala mơnuih ƀôn sang dêh čar hăng ƀing pơ ala gưl ƀôn prong, tơring glông Hòa Vang hrom hăng 11 boh să amăng tơring glông Hòa Vang.

Khua tơhan krên dên ơi Tô Lâm, ding kơna ding jum kơđi čar, Khua ding jum kông an, ding kơna Khul pơphun ruah khua dêh čar lăi lĕ, ƀôn prong Đà Nẵng ngă djơ̆ hrơi blan pơkă, bruă dăp akŏ klôn, kơnong ngă tui hơdôm bruă phuă glăi anăn mơnuih ƀôn sang plĕ hră, pơsir hră tơgŭ kơđi, ƀom kiơng mơ̆ng ană plơi, pơtô pơblang, pơgang hơđong rơnuk rơnua laih anun pơgang klin Covid 19.

Khua tơhan krên dên ơi Tô Lâm rơkâo, khua mua ƀôn prong Đà Nẵng pơtum kơ bruă pơhlôm tơlơi rơnuk rơnua amăng hrơi blan plĕ hră ruah khua anun yơh phun.

Nay Jek: Pơblang