VOV4.Jarai - Tŏ tui mông jơnum lok 4, mơguah lơ 12/10, Jơnum min khua apăn bruă pơ ala mơnuih ƀon sang dêh čar jơnum hơgŏm, pơgôp hiăp kơ hơdôm tơlơi lăi pơthâo glăi mơng Kơnuk kơna kơ tơlơi dưi ngă amăng bruă pơđĭ kyar bơwih ƀong huă - mơnuih mơnam hăng him lăng prăk kơnuk kơna amăng thun 2021, akŏ bruă pơđĭ kyar bơwih ƀong huă - mơnuih mơnam thun 2022; him lăng hlâo prăk kơnuk kơna hơmâo hăng hơdră kah pơpha prăk kơnuk kơna thun 2022.

Mông jơnum mơng Jơnum min khua apăn bruă git gai pơ ala mơnuih ƀon sang dêh čar.

Tơlơi gơñăm nao amăng bruă pơplih ming tơlơi bơwih ƀong rơwang thun 2021-2025 lĕ pơplih rơđah amăng hơbô̆ bruă pơđĭ kyar kiăo tui pơđĭ kyar gơnam pơkra rai, pơkra hơmâo lu, klă, dưi bơkơtưn hrŏm arăng. Laih dong, mă yua tơlơi hơmâo, mơnuih mă bruă klă hloh, thâo gơgrong mă pô, dưi bơwih ƀong amăng rơnuk phrâo; amăng ƀrư̆ anăp nao tơlơi bơwih ƀong gơnang kơ boh thâo măi mok, pơplih hơdră ngă bruă, kiăng pơđĭ kyar tañ hăng hơđong kơjăp. Hrŏm hăng anun, hơkrŭ kơjăp tơlơi bơwih ƀong prong, hơmâo prăk pioh djru bruă bơwih ƀong hăng pơplih phrâo hơdeč hmar đah mơng dưi pơgăn glăi tơlơi bơbeč mơng rơngiao.

Siu H’Mai: Pơblang