VOV4.Jarai - Mơguah lơ 9/4, Kơ-iăng khua Jơnum min mơnuih ƀon sang tơring čar tơring čar Lâm Đồng Phan Văn Đa hơmâo mông bưp hăng mă bruă hăng Khua anih jưh pơ ala dêh čar Phần Lan Kara Kahiluoto. Amăng mông bưp, Khua anih jưh Kari Kahiluoto pơčrông sai, lăi pơthâo sa, dua tơlơi dưi hăng tơlơi gal amăng ngă hrŏm hăng Phần Lan hăng Lâm Đồng kah hăng wai lăng rơnoh ia hơdjă hăng wai pơgang ayuh hyiăng, pơƀut kĕ hĭ asuk ruk …

Mông bưp

Khua anih jưh pơ ala ăt lăi nao bruă pơtrut ngă hrŏm akŏ bruă hlong ia hơdjă mơ̆ Phần Lan glăk đing nao ƀơi plơi prong Bảo Lộc hăng pơdah tơlơi čang rơmang tơring čar amra đing nao pơtrut ngă tui akŏ bruă anai pơ anăp. Kơ-iăng khua Jơnum min mơnuih ƀon sang tơring čar tơring čar Lâm Đồng Phan Văn Đa pơpŭ bơni tal rai čuă hăng pơčrông sai ngă hrŏm mơng Khua sang anih jưh hăng ƀing khua mua. Ñu ăt brơi thâo, Lâm Đồng glăk gir run pơtrut pơđĭ kyar djop mơta bruă: amăng anun hơmâo sa, dua mơta bruă mơ̆ tơring čar Lâm Đồng glăk gir run djru brơi tơlơi thâo thăi kah hăng ngă hrŏm tuh pơ alin mơng Phần Lan anun lĕ pơjing plơi prong thâo rơgơi ƀơi Đà Lạt hăng Bảo Lộc, wai lăng čroh ia, pơsir bruă ia yua hơƀak jrăk, wai lăng glai rưng tui boh thâo măi mok.

Siu Đoan: Pơblang