VOV4.Jarai - Jơnum min ruah khua tơring čar Daklak yua kơ ơi Phạm Ngọc Nghị, Khua Jơnum min mơnuih ƀôn sang tơring čar, Kơ-iăng Khua Jơnum min ruah khua tơring čar ngă Khua grŭp hmâo nao pel ĕp bruă prăp lui ruah khual pơ ala mơnuih ƀôn sang tal 15 hăng khua pơ ala Jơnum min pơ ala mơnuih ƀôn sang hơdôm gưl, rơwang bruă 2021-2026 ƀơi plơi prong Buôn Hồ.

Ơi Phạm Ngọc Nghị pơhiăp klah čun mông mă bruă

Tui hăng tơlơi lăi pơthâo glăi mơng Jơnum min ruah khua plơi prong Buôn Hồ, bruă prăp lui kơ bruă ruah khua dưi hmâo plơi prong črâo ba, pok pơhai ngă tui tơlơi pơhlôm djơ̆ tơlơi pơkă. Jơnum min ruah khua plơi prong hmâo mă yua laih tơlơi pơtrun pơsit kơ bruă pơsit hăng lăi pơthâo mrô anom ruah khua, hră čih anăn hơdôm anom ruah khua hăng mrô khua pơ ala dưi ruah ƀơi rim anom bruă ruah khua pơ ala Jơnum min pơ ala mơnuih ƀôn sang plơi prong, khua pơa la Jơnum min pơ ala mơnuih ƀôn sang să, phường. Pơhiăp amăng mông klah čun mông mă bruă, ơi Phạm Ngọc Nghị rơkâo hơdôm bruă prăp lui khom ngă tui tŏng ten, pel ĕp tŏng ten kiăng hrơi ruah khua sit nik jing hrơi jơnum ngui mơng abih bang mơnuih ƀôn sang. Jơnum min ruah khua plơi prong Buôn Hồ črâo ba, pơtô brơi Jơnum min ruah khua hơdôm bôh să, phường đing nao pok pơhai hơdôm bruă mă pơhlôm tui djơ̆ rơnoh; pel ĕp, pơdŏng djop tum hơdôm jơlan gah pơhlôm rơnuk rơnua, pơhlôm kơ bruă ruah khua, amra bŏng glăi amăng hơdôm tơlơi amra hmâo klin ngă, ayuh hyiăng ƀu klă ngă./.

Siu H’ Prăk: Pô pơblang