VOV4.Jarai-Ƀơi Hà Nội, Anom bruă khua pơ ala mơnuih ƀôn sang dêh čar Jơnum pơƀut bruă mă sa rơwang bruă mơ̆ng ƀing pơ ala thun dŏ hlăk ai tal 14 thun 2016-2021. Kơ-iăng khua git gai pơ ala mơnuih ƀôn sang dêh čar, ơi Đỗ Bá Tỵ nao jơnum hrŏm. Lu tơlơi pơgôp hiăp lăi:

Ƀing pơ ala mơnuih ƀôn sang dêh čar thun dŏ hlăk ai hơmâo djru sa črăn ƀu anet ôh, tŭ yua lu amăng bruă mă čih pơkra tơlơi phiăn, ĕp lăng hăng pơtrun lu bruă mă yom kơ lŏn ia kơ anom bruă pơ ala mơnuih ƀôn sang dêh čar tal 14, lăi pơtong tơlơi dưi, bruă mă hăng anŏ glăm ba mơ̆ng hlăk ai Việt Nam amăng anom bruă čih tơlơi phiăn hơmâo tơlơi dưi prong hloh amăng kơnuk kơna, jing lăp hăng anŏ đăo kơnang mơ̆ng Ping gah, anom bruă pơ ala mơnuih ƀôn sang dêh čar, mơnuih ƀôn sang hăng ƀing plĕ hră ruah khua amăng dêh čar.

Samơ̆, ƀing pơ ala ăt pơdah pran jua yua ƀing pơ ala tun hlăk ai, yua kơ anun dŏ kơƀah tơlơi găn rơgao amăng bruă mă, kiăng gir run hloh, hrăm tui lu hloh. Pơhiăp ƀơi mông jơnum, ơi Đỗ Bá Tỵ brơi thâo, amra lăi pơthâo hăng Jơnum min git gai pơ ala mơnuih ƀôn sang pioh ĕp hơdră djru ba tŭ yua hloh pioh kơ khul hlăk ai ngă pô pơ ala kơ mơnuih ƀôn sang gưl dêh čar.    

Nay Jek: Pơblang