VOV4.Jarai - Amăng mông jơnum pơgôp hiăp lok 3, 100% mrô khua mua nao jơnum tŭ ư hăng hră čih anăn 205 čô khua mơng hơdôm anom bruă, khul grup, anom bruă mơng gơnong glông dưi ruan ngă Khua mua pơ ala mơnuih ƀon sang dêh čar tal 15. Jơnum yua Jơnum min Jơnum min djop djuai ania mơnuih mơnam Việt Nam pơphun amăng mơguah lơ 15/4, ƀơi Hà Nội. Tơdơi kơ pơđut mông Jơnum pơgôp hiăp lok 2, tui hăng jŭ yap mơng Khul pơphun plĕ hră dêh čar, abih bang mơnuih čih anăn jang jai mơng gơnong glông hăng ƀon lan lĕ 1 rơbâo 093 čô. Amăng anun, Gơnong glông hơmâo 205 čô, mơng ƀon lan lĕ 888 čô hăng hơmâo 75 čô rơkâo mă pô.

Yua anun, mrô 2,19 čô mơnuih amra ruah ngă 1 čô hơmâo Khua pơ ala mơnuih ƀon sang dêh čar ruah đĭ. Amăng mông jơnum, ƀing khua mua amra hluai tui hơnong pơkă ruah ngă Khua mua pơ ala mơnuih ƀon sang dêh čar, tơlơi pơgôp hiăp mơng mơnuih ƀon sang ƀơi anih ƀing gơñu dŏ hơdip mơng anun amra sem lăng djơ̆ hăng tơlơi sit nik. Ƀing khua mua ruah đĭ mơnuih amra lăi pơthâo kơ bruă ruah đĭ ƀing pô ania ngă Khua pơ ala mơnuih ƀon sang dêh čar tal 15.

Đĭ pơhiăp amăng mông jơnum, Khua apăn bruă Ping gah, Khua Jơnum min djop djuai ania mơnuih mơnam Việt Nam ơi Đỗ Văn Chiến lăi pơtong: Jơnum pơgôp hiăp lok 3 lĕ sa amăng hơdôm bruă yôm phun hlâo kơ plĕ hră ruah khua, anai lĕ jơnum pơgôp hiăp tal rơnuč, kiăng kơ čih anăn ƀing mơnuih djơ̆ hăng tơlơi pơkă mơ-it khul pơphun plĕ hră ruah khua kiăng kơ tŏ tui hơdôm bruă kiăo tui pơ anăp dong.

Siu Đoan: Pơblang