VOV4.Jarai-Lơ 22/4, ƀơi plơi prong Đà Lạt, Jơnum min mơnuih ƀôn sang tơring čar Lâm Đồng hăng Khua anom bruă pơ ala dêh čar India ƀơi ƀôn prong Hồ Chí Minh jơnum “Anŏ thâo hơmâo, anŏ gêh găl tuh pơ alin nao pơ Lâm Đồng hăng ngă bruă hăng dêh čar India amăng bruă ngă hmua”.

Ƀơi mông jơnum, pơ ala kơ khua mua tơring čar, ơi Phan Văn Đa, Kơ-iăng Khua jơnum min mơnuih ƀôn sang tơring čar Lâm Đồng lăi, ră anai djop sang bruă sĭ mơdrô, sang anŏ mơnuih ngă hmua amăng tơring čar hlăk ngă hmua pla pơjing, sĭ mơdrô lu mơta gơnam tam mơ̆ng đang hmua hiam klă, tŭ yua, amăng anun hơmâo lu gơnam dưi hơmâo Anom bruă pơgang boh thâo ia rơgơi Việt Nam ngă brơi hră tŭ yap djă anăn gơnam sĭ mơdrô phara ngă pô kah hăng añăm pơtam, bơnga, če, kơphê hăng lu mơta gơnam pơkŏn.

Anai lĕ tơlơi gêh gal pioh kơ djop sang bruă kơnuk kơna ƀơi Lâm Đồng, mơnuih ƀôn sang hăng ƀing sĭ mơdrô amăng tơring čar pơtrut pôr pơthâo, pok pơhư bruă ngă hrom ngă hmua pla pơjing hăng bơblih nao rai gơnam sĭ mơdrô hăng lu dêh čar amăng rŏng lŏn tơnah, amăng anun hơmâo dêh čar India-sa boh anih sĭ mơdrô mơ̆ ră anai Lâm Đồng hlăk gleng nao rơkâo ba nao sĭ mơdrô laih anun blơi pơmut.

Nay Jek: Pơblang