VOV4.Jarai - Mơng lơ 5-11/5, Jơnum min djop djuai ania mơnuih mơnam Việt Nam tơring čar Khánh Hòa pơphun Jơnum bưp mơnuih ƀon sang kiăng kơ rơkâo tơlơi dong yua plĕ hră brơi ƀing mơnuih tơbiă anăn ruah ngă Khua pơ ala mơnuih ƀon sang dêh čar tal XV rơwang thun 2021-206. Khua anom bruă bơwih ƀong huă dêh čar Trần Tuấn Anh nao jơnum hrŏm ƀơi Anom bruă plĕ hră ruah khua mrô 1, hơmâo plơi prong Ninh Hòa hăng tơring glông Vạn Ninh, tơring čar Khánh Hòa. Amăng mông bưp mơnuih ƀon sang, ơi Trần Tuấn Anh hơmâo lăi pơthâo hơdôm boh tơhnal jơlan hơdră bruă mă mơng ñu.

Sa, dua bruă akŏ phun sui thun hơmâo Khua anom bruă bơwih ƀong huă dêh čar Trần Tuấn Anh pơsit anun lĕ: Kiăo tui lăng sit nik, hơdip jê̆ giăm hăng mơnuih ƀon sang, đing tơngia hmư̆ tơlơi rơkâo đĭ mơng ană plơi pla hăng anom bơwih ƀong sĭ mơdrô kiăng kơsem min, pơphô bruă, rơkâo đĭ Kơnuk kơna pơjing hơdră bruă, tơlơi črâo trun lăp djơ̆ hăng tơlơi dưi lŏn ia, djuai ania ta, yua kơ mơnuih ƀon sang, lăng mơnuih ƀon sang lĕ akŏ phun laih dong lĕ hơnong pơkă bruă mă, hơdră pơđĭ kyar bơwih ƀong huă - mơnuih mơnam hơmâo lăi nao amăng tơlơi pơsit Jơnum ruah khua Ping gah tal XVIII tơring čar Khánh Hòa hăng bruă yôm phun ngă tơlơi bơwih ƀong huă amăng tơring čar Khánh Hòa pơđĭ kyar, hơđong kjăp.

Siu Đoan: Pơblang