VOV4.Jarai - Git gai hăng đĭ pơhiăp ƀơi mông jơnum lăng nao rai amăng tivi hăng Anom git gai bruă dêh čar hăng 63 boh tơring čar, ƀon prong kơ bruă pơgang klin Covid-19 pơphun tlam lơ 7/5, ƀơi Sang bruă Kơnuk kơna, Khua dêh čar ơi Phạm Minh Chính lăi, ƀu dưi brơi hơmâo sa čô mơnuih kơƀah tơlơi pơmin pơgang klin mơ̆ ngă abih bang mơnuih mơnam glêh yua. Mơng bruă hyu ĕp kru, hăng ĕp klin hơmâo mơng pô hlơi, Anom git gai bruă dêh čar pơsit anih hơmâo klin ƀơi Hà Nam bơdjơ̆ nao pô ƀă klin 2899, klin ƀơi Yên Bái, Vĩnh Phúc bơdjơ̆ nao ƀing rơgơi kơhnâo dêh čar India hăng Khač, klin ƀơi Sang ia jrao K hơmâo mơng Sang ia jrao Nhiệt đới Trung ương. Khă hnun, anih hơmâo klin ƀơi Sang ia jrao Nhiệt đới Trung ương hăng hơdôm čô ƀă klin ƀơi Đà Nẵng, Hải Dương lĕ ƀu thâo hơmâo mơng hơpă ôh. Tơlơi anun brơi ƀuh, amăng plơi pla hơmâo klin. Mơng klin ƀơi Sang ia jrao K hăng Sang ia jrao Nhiệt đới Trung ương, Khua ding jum ia jrao ơi Nguyễn Thanh Long pơsit, hơdôm boh sang ia jrao khŏm wai lăng kơjăp hơdôm anih amuñ hơmâo klin kah hăng anih khăm, pơjrao mơnuih ruă kraih, pơjrao boh ƀleh. Sang ia jrao hăng mơnuih mă bruă ia jrao kiăng hơmâo mă drah hăng pơčrang kman tui tơđar, kiăng tañ ƀuh mơnuih ƀă kman.

Pơhiăp ƀơi mông jơnum, Khua dêh čar ơi Phạm Minh Chính git gai kiăng kơđiăng, ƀu dưi pơ-ai ôh amăng bruă pơgang klin. Khua dêh čar ta ăt lăi mơn, hơdôm tơring čar, ƀon prong lơ̆m hơmâo klin, ƀu dưi bral ôh, kiăng pơmin dlăm, pơtŏng lăng lăp djơ̆ hŭi ba tơbiă hơdră pơgang hlao đơi, ngă sat kơ tơlơi hơdip mơnuih ƀon sang hăng tơlơi pơđĭ kyar bơwih ƀong.

Siu H’Mai: Pơblang