VOV4.Jarai-Tlam lơ 10/5, Khua dêh čar ơi Phạm Minh Chính git gai jơnum kơplah wah Kơnuk kơna hăng Khul git gai mơ̆ng dêh čar kơ bruă pơhlôm, pơgang Covid 19, pioh pơčrông sai pơsir hĭ anŏ kơƀah, laih dơ̆ng  ĕp hơdră kơtang hloh amăng bruă pơhlôm, pơgang Cơvid 19.

Khua dêh čar Kơnuk kơna ơi Phạm Minh Chính

Lu tơlơi pơgôp hiăp ƀơi mông jơnum, lêng kơ lăi ƀuh rơđah dêh čar ta ăt hơmâo pơgăn laih mơ̆n tơlơi pơhing klin, mah tal hơđuh glăi anai hmar hloh, lu hloh, tơnap tap hloh, gleh biă mă ĕp lăng, anŏ bơbeč mơ̆ng ñu kơtang tui. Samơ̆ tơdah ƀing ta ƀu ngă tui lu hơdră hmar, khut khăt kơtang hloh, ƀudah ƀing ta ngă amưng, sư̆ rơbư̆ ƀu kơđiăng tong ten, ĭn glăi đôč ƀing ta amra glăm ba boh tơhnal sat răm ƀu dưi thâo ôh.

Yua kơ anun, Khua dêh čar pơtă pơtăn khom pơđĭ tui boh tơhnal dưi ngă laih hăng tơlơi thâo thăi tom găn rơgao pơhlôm pơgang 3 tal hlâo kơ anai, khom hơđong pran jua, pơmin kjăp, tong ten, hơdeč hmar, lăng nao kơ tơlơi pơhing sit nik, pơphun djơ̆, ngă tui khut khăt ba glăi boh tŭ yua hăng hơdôm hơdră djơ̆ găl, tui tơlơi git gai mơ̆ng Khul khua apăn bruă git gai ping gah dêh čar, Kơnuk kơna dêh čar, Khua dêh čar hăng Khua git gai Khul mơ̆ng dêh čar pơhlôm pơgang klin.

Nay Jek: Pơblang