VOV4.Jarai - Tơdơi kơ Ding kơna Ding jum kơđi čar ơi Nguyễn Xuân Phúc dưi hmâo Khua pơ ala mơnuih ƀôn sang dêh čar ta ruah ngă Khua mir sir dêh čar mơtăm, Khua dêh čar Kur ơi Samdech Hun Sen mơ-ĭt hră hơ-ư̆č hmưi. Khua dêh čar Hun Sen pơdah pran jua đăo gơnang lĕ, gah yŭ tơlơi git gai mơng Khua mir sir dêh čar ơi Nguyễn Xuân Phúc Việt Nam amra hmâo lu yak đĭ kyar hloh dong kơ tơlơi bơwih ƀong hăng mơnuih mơnam, ngă tui tơlơi pơplih phrâo tơhnal pơkă jing dêh čar pơđĭ kyar amăng thun 2045 hăng jing pô yôm phăn amăng bruă mă ƀơi kual hăng rŏng lŏn tơnah. Khua dêh čar Hun Sen pơkôl amra gum hrom kơjăp dong bruă mă hăng Khua dêh čar tô̆ tui kiăng hơkrŭ tơlơi gum hrom sui thun, hăng pran jua ƀing gŏp jê̆ giăm klă, gum hrom hơbit, thâo hluh nao rai tơdruă hăng gum hrom yua kơ bôh tŭ yua hrom, biă ñu yak rơgao tơlơi lông mơng klin ruă Covid-19 ră anai./.

Siu H’ Prăk: Pô pơblang