VOV4.Jarai - Lơ 9/5, Khua dêh čar ta ơi Phạm Minh Chính hmâo nao pel ĕp bruă pơgang, pơgăn klin ƀơi hơdôm bôh tơring čar guai lŏn ia Dơnung Yŭ dêh čar hăng iâu pơƀut jơnum lăng nao rai ječ amăng tivi mơng akô̆ phun pơdah Jơnum min mơnuih ƀôn sang tơring čar An Giang hăng Grŭp črâo ba bruă pơgang pơgăn klin Covid-19 lŏn ia ta, sa dua ding jum gơnong bruă hăng khua git gai 6 bôh tơring čar guai lŏn ia Dơnung Yŭ dêh čar. Amăng 10 hrơi rơgao đơ đam dêh čar hmâo čih pioh 257 čô mơnuih ƀă kơman Covid-19 amăng mơnuih mơnam. Rơgao kơ lăng tui brơi ƀuh lu tơring čar ăt dô̆ lui raih mơn, ƀu đing nao ôh, ƀu kơđiăng lom akă hmâo klin ngă ƀơi tơring čar, samơ̆ truh klin ngă lĕ sôl rơngôl, ngă tui lu bruă pơgang rơgao hơnong đơi. Klah čun bruă jơnum, Khua dêh čar ta ơi Phạm Minh Chính lăi rơđah tơdah klin ngă amăng đơ đam dêh čar ta amra bơdjơ̆ nao truh tơlơi hơđong bruă kơđi čar, tơlơi suaih pral mơnuih ƀôn sang, bruă ruah khua pơ ala mơnuih ƀôn sang dêh čar hăng Khul pơ ala mơnuih ƀôn sang hơdôm gưl, bruă pơđut thun hrăm 2020-2021 bôh than pioh glăi amra ƀu hmao thâo ôh. Yua anun, hơdôm anih anom, ƀirô, anom bruă pơgang, pơgăn klin dong, hơkrŭ pơsir anô̆ pioh glăi, djă kơjăp tơlơi rơnuk rơnua bruă kơđi čar, hơđong pơhlôm mơnuih mơnam hăng tơlơi pơmin črâo ba “Tañ hloh, tañ hloh dong; klă hloh, klă hloh dong; khop hloh, khop hloh dong; ba glăi bôh tơhnal hloh, ba glăi bôh tơhnal hloh dong; truh kih, truh kih hloh dong”./.

Siu H’ Prăk: Pô pơblang