VOV4.Jarai - Ƀrô djơ̆ tal Tết tui phiăn juăt Chôl Chnăm Thmây thun 2021 mơng neh wa djuai ania Khmer, Khua dêh čar ta ơi Phạm Minh Chính hmâo mơ-ĭt laih Hră hơ-ưč hmưi truh neh wa, khua apăn bruă hăng ƀing mă bruă amăng khul đăo phơ̆t djuai ania Khamer. Pơ ala kơ khua git gai Ping gah hăng Kơnuk kơna, Khua dêh čar mơ-ĭt tơlơi tơña bla, hơ-ư̆č hmưi hăng čang rơmang hơdôm tơlơi klă hiam hloh truh hăng neh wa, khua apăn bruă, hăng ƀing mă bruă amăng khul đăo phơ̆t djuai ania Khmer. Amăng tơlơi klin Covid-19 ngă ăt dô̆ ngă dlêh tơnap, Khua dêh čar ta đăo gơnang lĕ hăng pran pơsit mơng hơdôm gưl, hơdôm gơnong bruă hăng mơnuih ƀôn sang, neh wa djuai ania Khmer amra čơkă Tết tui phiăn juăt Chôl Chnăm Thmây hơđong pran jua hăng hmâo djop bôh yôm bôh thâo, ngă tui hơdôm gru grua, phiăn juăt đưm klă hiam mơng pô. Hrom hăng anun, ngă tui dong phiăn juăt khăp kơ lŏn ia, mut hrom, hrăm tui klă, pơhrăm pô, pơđĭ tui pran jua hăng bôh thâo, triăng mă bruă bơwih ƀong huă, hrưn đĭ dưi hmâo mă lu bôh than truh kih prong, djru hrom đơ đam dêh čar ngă tui truh kih hơdôm tơhnal pơkă, bruă pơđĭ kyar bơwih ƀong – mơnuih mơnam hmâo ba tơbiă./.

Siu H’ Prăk: Pô pơblang