VOV4.Jarai-Tlam lơ 6/4, ƀơi sang bruă Kơnuk kơna, ƀrô tal ơi Phạm Minh Chính dưi ruah ngă khua dêh čar Việt Nam, Khua dêh čar Lao, ơi Phankham Viphavanh hăng Khua dêh čar Kur, ơi Samdech Techo Hun Sen iâu telephôn bơni hơ-ơč.

Khua dêh čar ơi Phạm Minh Chính

Khua dêh čar Lao, ơi PhankhamViphavanh hăng Khua dêh čar Kur, ơi Hun Sen pơdah pran jua đăo kơnang prong mơ̆ng Ping gah, Kơnuk kơna hăng mơnuih ƀôn sang Việt Nam, Khua dêh čar phrâo, ơi Phạm Minh Chính amra ngă giong bruă jao, git gai kơnuk kơna Việt Nam dưi tŭ mă lu boh tơhnal phrâo amăng bruă mă man pơdong hăng pơđĭ kyar lŏn ia, ƀu pơdơi ôh pơđĭ tui tơlơi glăm ba, pơdah rai kơnuih prong mơ̆ng Việt Nam amăng kual hăng jar kmar.

Khua dêh čar ơi Phạm Minh Chính hăng Khua dêh čar Lao, ơi Phankham Viphavanh tŭ ư bruă ngă hrŏm dua bơnah kơnuk kơna, khom ngă tui djơ̆ jơlan hơdră tơlơi pơkôl pơkă hăng boh tơhnal jơnum mơ̆ng Jơnum min ngă hrŏm kơnuk kơna Việt Nam hăng Lao tal 43.

Khua dêh čar ơi Phạm Minh Chính hăng Khua dêh čar Kur, ơi Hun Sen ăt tŭ ư ngă hrŏm kjăp mơ̆n amăng mông jơnum lu bơnah dêh čar, hrŏm hăng hơdôm ding kơna pơkŏn djă bong tơlơi gum pơgôp hăng pơtrut tơlơi gơgrong glăm ba phun amăng kual ASEAN.

Nay Jek: Pơblang