VOV4.Jarai - Khua dêh čar ta ơi Phạm Minh Chính phrâo git gai mông jơnum khua mua Kơnuk kơna kơ bruă ruah khua pơ ala mơnuih ƀon sang dêh čar tal 15 hăng khua pơ ala mơnuih ƀon sang djŏp gưl rơwang thun 2021-2026 amăng hrơi mông klin Covid-19 glăk kơtang. Hơdôm tơlơi pơgôp hiăp lêng tŭ ư kiăng hơmâo hơdră ngă bruă rơđah rơđông hăng rim kual hơmâo klin Covid-19 hlâo, amăng hrơi hăng tơdơi hrơi ruah khua. Ding jum ia jrao pơtrun akŏ bruă ia jrao bơwih brơi bruă ruah khua, pơƀut amăng 3 tơlơi yôm phun: Hơdjă agaih anih anom hăng rơnuk rơnua Covid-19; rơnuk rơnua gơnam ƀong huă; bruă djru mơnuih ruă kraih hăng sa, dua čô hơmâo tơlơi truh pơkŏn dong. Ding jum ia jrao hơmâo pơtŏp brơi kơ hơdôm boh sang ia jrao gưl tơring glông truh pơ tơring čar, laih dong git gai hơdôm boh tơring čar hyu pel ĕp, wai lăng.

 Khua dêh čar ơi Phạm Minh Chính git gai jơnum bruă ruah khua.

Tơdơi mông jơnum anai, Ding jum ia jrao amra ngă hrŏm hăng Ding jum bruă čar kiăng hơmâo tơlơi pơtô ba rơđah, biă ñu lĕ hơdră ngă bruă hăng hơdôm boh tơring glông glăk hơmâo klin, ƀing glăk đih pơjrao. Hơdôm tơlơi pơgôp hiăp ƀơi mông jơnum ăt rơkâo đĭ mơn, kiăng pơphun ruah khua kiăo tui mông, dŏ ataih, gôm ƀô̆, anih rơhaih. Kơthung pioh hră plĕ ƀơi anih hơmâo klin khŏm pruih jrao hlâo či jŭ yap hră. Tum pơƀut glăi hơdôm tơlơi pơgôp hiăp, Khua dêh čar ơi Phạm Minh Chính lăi bruă krăp lăng kiăo tui tơlơi pơtrun kiăng pơphun klă bruă ruah khua.

Siu H’Mai: Pơblang