VOV4.Jarai - Hmư̆ tui tơlơi jak iâu mơng Khua wai lăng, Khua git gai Grŭp Nikkei Tsuyoshi Hasebe, Khua dêh čar ta ơi Phạm Minh Chính amra nao pơhmư̆ bruă Jơnum jar kơmar kơ “Pơgi kơdih anai kual ASIA” tal 26 yua Nikkei pơphun tui hơdră lăng nao rai amăng tivi mơng lơ 20-21/5/2021.

Dưi pơphun kah hăng rim thun mơng thun 1995 (rơngiao kơ thun 2020 yua kơ klin Covid-19), bruă Jơnum lĕ sa tơlơi bơkơtuai jar kơmar hmâo tơlơi đăo gơnang, tum pơbut lu khua mua apăn bruă kơđi čar, tơlơi bơwih ƀong hăng kơsem min mơng djop kual ASIA – Thái Bình Dương lăi tơlơi rơkâo đĭ kơ hơdôm tơlơi amăng kual hăng bruă mă mơng ASIA ƀơi rŏng lŏn tơnah. Hăng anăn ñu “Pơjing rơnuk phrâo rơnuč klin Covid-19: Bruă mă mơng ASIA lom hơkrŭ glăi đơ đam rŏng lŏn tưnah”. Jơnum tal anai hmâo tơlơi gum hrom mơng lu khua mua git gai ƀơi kual ASIA. Amăng mông jơnum, ƀing khua nua hăng ƀing juăt bruă pơkă lăng hlâo amra bơkơtuai kơ bruă ASIA amra dưi yak nao rơnuk phrâo hiưm hơpă amăng rơwang bă kơ tơlơi tơnap kah hăng ră anai./.

Siu H’ Prăk: Pô pơblang