VOV4.Jarai - Mơguah lơ 15/4, ƀơi Ƀirô Kơnuk kơna, Khua dêh čar ta ơi Phạm Minh Chính git gai jơnum Kơnuk kơna blung a tơdơi kơ arăng ruah đĭ ngă khua amăng jơnum lok 11, Khua pơ ala mơnuih ƀon sang dêh čar tal 14 kiăng pơčrông sai kơ bruă mă tơdơi kơ Kơnuk kơna ruah giong khua mua, hơmâo tơlơi pơsit bruă git gai hăng sa, dua boh tơhnal yôm phun đing nao git gai ngă tui hăng pok pơhai bruă mă mơng Kơnuk kơna pơ anăp anai.

Đĭ pơhiăp amăng mông jơnum, Khua dêh čar ta ơi Phạm Minh Chính lăi pơtong, anai lĕ jơnum blung a mơng Kơnuk kơna tơdơi kơ ruah giong khua mua, anai ăt lĕ jơnum yôm phăn. Khua dêh čar ta ơi Phạm Minh Chính lăi rơđah bruă mă mơng Kơnuk kơna tơdơi kơ ruah giong khua mua lĕ pok pơhai bruă jao mơtăm; đing nao pơsir hơdôm bruă dŏ ngă tơnap tap hăng pran jua khut khăt, ječ ameč, ba tơbiă hơdră sui thun pơ anăp, hơdră pơsir tong ten, tŭ yua kiăng pok pơhai mơtăm amăng rĭm gơnong bruă, anom bruă.

Siu Đoan: Pơblang