VOV4.Jarai - Lơ 5/5, ƀơi Hà Nội, Khua dêh čar ta ơi Phạm Minh Chính hơmâo git gai mông jơnum Kơnuk kơna tui tơđar blan 4/2021. Anai lĕ tal jơnum Kơnuk kơna tui tơđar blung a tơdơi kơ Kơnuk kơna ruah khua mua phrâo. Amăng mông jơnum Kơnuk kơna tui tơđar blan 4/2021, Kơnuk kơna đing nao pơčrông sai 8 mơta bruă, hơmâo sa, dua bruă ngă tơnap tap giăm anai amăng pơgang klin Covid-19 lơ̆m klin glăk lar hyu, amra hơmâo tơlơi truh sat ƀu hmao thâo, lu tơring čar hơmâo mơnuih ƀă klin. Hrŏm hăng anun, Kơnuk kơna pơčrông sai bruă prap lui tal plĕ hră ruah Khua mua pơ ala mơnuih ƀon sang dêh čar tal XV hyăng khua mua khul pơ ala mơnuih ƀon sang djop gưl rơwang thun 2021-2026, pơhlôm klă tal plĕ hră yôm phăn amra pơphun amăng blan anai. Ăt amăng mông jơnum, Kơnuk kơna amra hmư̆ hăng pơčrông sai kơ bruă bơwih ƀong huă-mơnuih mơnam amăng blan 4 hăng 4 blan akŏ thun 2021 hăng sa, dua boh tơhnal yôm phun pơkŏn.

Siu Đoan: Pơblang