VOV4.Jarai - Lơ 13/5, Khua dêh čar ta ơi Phạm Minh Chính mă bruă hăng ƀôn prong Hồ Chí Minh kơ tơlơi bơwih ƀong huă amăng 3 blan akŏ thun 2021 hăng pơsir hĭ sa, dua tơlơi rơkâo mơng ƀôn prong Hồ Chí Minh. Anai lĕ ƀôn prong blung a Khua dêh čar ta nao mă bruă tơdơi kơ ruah đĭ ngă khua deh čar ta, tơlơi anai brơi ƀuh tơlơi đing nao mơng Kơnuk kơna hăng bruă pơđĭ kyar ƀôn prong Hồ Chí Minh.

Khua Jơnum min mơnuih ƀon sang ƀôn prong Hồ Chí Minh hơmâo rơkâo hăng Kơnuk kơna, Khua dêh čar ta 5 mơta bruă anun lĕ: pơjing tơlơi pơsit phrâo, plih hĭ tơlơi pơsit mrô 93 mơng Kơnuk kơna ta kiăng čih pơkra, pơhrua sa, dua tơlơi kơ bruă pơsit gưl, tơlơi dưi brơi ƀôn prong Hồ Chí Minh; pơsir hĭ tơlơi ngă tơnap tap, gun găn lơ̆m ngă tui tơlơi pơsit mrô 54 mơng Khua pơ ala mơnuih ƀon sang dêh čar; kơ bruă tuh pơ alin, man pơkra ring bruă sui gap ƀrô rơwang thun 2021-2025; hơdôm tơlơi rơkâo bơdjơ̆ nao plơi prong Thủ Đức kơ hơdră bruă ƀơi plơi prong, man pơkra anih anom jơlan glông ƀơi plơi prong Thủ Đức; hơdôm tơlơi rơkâo bơdjơ̆ nao bruă wai lăng ƀôn prong Hồ Chí Minh.

Siu Đoan: Pơblang