VOV4.Jarai -  Khua dêh čar ta ơi Phạm Minh Chính hmâo mơ-ĭt hră hơ-ư̆č hmưi ƀrô djơ̆ tal ơi Kishida Fumio dưi ruah ngă Khua dêh čar tal 100 mơng dêh čar Japan. Khua ding jum pơtom hiăp dêh čar ta ơi Bùi Thanh Sơn ăt hmâo mơ-ĭt laih mơn hră hơ-ư̆č hmưi ơi Motegi Toshimitsu dưi ruah ngă Khua Ding jum pơtom hiăp dêh čar Japan. Lăi glăi tơlơi tơña mơng mơnuih hyu mă tơlơi pơhing phrâo kơ bruă Japan hmâo Khua dêh čar phrâo, Mơnuih truh pơhiăp mơng Ding jum pơtom hiăp yă Lê Thị Thu Hằng brơi thâo: “Việt Nam hơ-ư̆č hmưi ơi Kishida Fumio dưi ruah ngă Khua dêh čar tal 100 mơng Japan. Ƀing gơmơi đăo gơnang lĕ, gah yŭ tơlơi git gai mơng Khua dêh čar ơi Kishida Fumio, lŏn ia Japan pơđĭ kyar dong, mơnuih ƀôn sang jai hrơi jai yâu mơ-ak. Việt Nam lăng yôm bruă gum hrom giăng mah hăng Japan hăng čang rơmang gum hrom kơjăp hăng Khua dêh čar hăng Kơnuk kơna phrâo mơng Japan kiăng ngă brơi tơlơi rô nao rai Gum hrom dơlăm Việt Nam hăng Japan ƀu pơdơi pơđĭ kyar truh tơhnal phrâo, yua kơ bôh tŭ yua mơng mơnuih ƀôn sang dua bôh dêh čar, yua kơ tơlơi rơnuk rơnua, hơđong, gum hrom hăng pơđĭ kyar mơng kual hăng ƀơi rŏng lŏn tơnah”./.

Siu H’ Prăk: Pô pơblang