VOV4.Jarai - Čơtlăm lơ 23/4, ƀơi Anih mă bruă Khua mir sir dêh čar Cung Bogor pơ̆ plơi prong jưh jom Jakarta, dêh čar Indonesia hlâo kơ hmư̆ mông Jơnum yôm phăn ƀing khua mua ASEAN, Khua dêh čar ta ơi Phạm Minh Chính hmâo lăi pơthâo hăng Khua mir sir dêh čar Indonesia Joko Widodo.

Khua dêh čar Phạm Minh Chính hăng Khua mir sir dêh čar Indonesia Joko Widodo hmâo mông bưp bơrăruai

Ơi Joko Widodo čơkă jum hur har pran jua biă hăng hơ-ư̆č hmưi Khua dêh čar ơi Phạm Minh Chính dưi hmâo Khua pơ ala mơnuih ƀôn sang dêh čar ta đăo gơnang ruah ngă khua git gai dlông hloh amăng Kơnuk kơna. Khua dêh čar ta pơsit yôm tơlơi gir run mơng Indonesia amăng bruă pơgang pơgăn Covid-19 hăng đăo gơnang lĕ, Indonesia amra yak rơgao hơdôm tơlơi tơnap; wai lăng klă klin ruă hăng pơđĭ kyar bơwih ƀong mơnuih mơnam; anăp nao ngă tui tơlơi pơplih phrâo “Tơhnal lăng Indonesia thun 2045”. Ơi Phạm Minh Chính lăi pơthâo hăng Khua mir sir dêh čar Indonesia sa dua gru prong kơ bôh tơhnal Jơnum Ping gah đơ đam dêh čar tal 13 mơng Việt Nam, hơdôm jơlan gah pơsit phun mơng Kơčăo bruă pơđĭ kyar mơng thun 2021-2025 hăng tơhnal lăng truh thun 2030 – 2045 mơng Việt Nam./.

Siu H’ Prăk: Pô pơblang