VOV4.Jarai - Hmư̆ tui tơlơi jak iâu mơng pơtao dêh čar Brunei Darussalam Sultan Haji Hassanal Bolkiah, Khua khul ASEAN thun 2021, mơguah anai lơ 23/4, Khua dêh čar ta ơi Phạm Minh Chính pơpĕ đuăi mơng Hà Nội, ba jơlan hlâo grŭp khua pơ ala gưl dlông Việt Nam nao pơhmư̆ Jơnum ƀing Khua mua ASEAN ƀơi ƀirô mă bruă Grŭp čih pioh ASEAN pơ̆ plơi prong jưh jom Jakarta, dêh čar Indonesia amăng 2 hrơi, hrơi anai hăng hrơi pơgi (23-24/4/2021). Anai lĕ tal nao pơ̆ dêh čar tač rơngiao blung a hăng sa čô Khua dêh čar mơng ơi Phạm Minh Chính, pơsit đing nao mơng Việt Nam lĕ hruă kơjăp hăng hơkrŭ đĭ pran jua mut hrom, djru nao rai hăng hơdôm bôh dêh čar ding kơna ASEAN, djru pơđĭ tui bruă mă phun hăng pran gơgrong mơng ASEAN amăng pơsir hơdôm tơlơi lông ƀuh rơđah hloh, mơng anun pơjing rai tơlơi rơnuk rơnua, gêh gal kơ pơđĭ kyar kơjăp phik mơng rim dêh čar hăng đơ đam kual./.

Siu H’ Prăk: Pô pơblang