VOV4.Jarai-Tŭ ư tơlơi jak iâu mơ̆ng Khua ding jum ling tơhan dêh čar Việt Nam, grup khua mua pơprong gah ling tơhan dêh čar Khač yua kơ Thượng tướng ơi Ngụy Phượng Hòa, ding kơna apăn bruă kơnuk kơna, Khua ding jum ling tơhan dêh čar Khač ngă khua grup ba jơlan hlâo rai čuă Việt Nam mơ̆ng lơ 24-27/4.

Ngă lơphet tŭ jum Khua ding jum ling tơhan dêh čar Khač

Mông jơnum čơkă jum pơphun tlam lơ 25/4 ƀơi Hà Nội, yua kơ Thượng tướng ơi Phan Văn Giang, ding kơna jum kơđi čar, kơ-iăng khua git gai ping gah ling tơhan dêh čar, Khua ding jum ling tơhan Việt Nam git gai. Giong ngă lơphet čơkă jum, grup khua mua ling tơhan dua bơnah hlong bơkơtuai nao rai.

Ơi Phan Văn Giang lăi, Ping gah, kơnuk kơna, lŏn ia Việt Nam hăng ling tơhan mơnuih ƀôn sang Việt Nam lăng yom bruă ngă hrom gơyut gơyâo gru grua hăng dêh čar Khač laih anun pơtrut bruă ngă pŭ ƀăn giăng mah phara hăng dêh čar Khač. Thượng tướng ơi Ngụy Phượng Hòa ăt lăi, tơlơi giăng mah rô nao rai kơplah wah dêh čar Khač hăng Việt Nam sa amăng hơdôm bruă mă yom pơphăn djru hrom pơđĭ tui tơlơi giăng mah pŭ ƀăn, ngă hrom kơplah wah Ping gah, kơnuk kơna, pơgang ba anŏ tŭ yua mơ̆ng mơnuih ƀôn sang dua bơnah, yua kơ tơlơi rơnuk rơnua mơak, hơđong, ngă hrom, pơđĭ kyar ƀơi rĭm boh dêh čar ăt kah hăng amăng kual laih anun ƀơi rŏng lŏn tơnah.

Nay Jek: Pơblang