VOV4.Jarai - Čơtlăm lơ 15/4, ƀơi Sang mă bruă Khua pơ ala mơnuih ƀôn sang dêh čar ta pơphun Jơnum mơng Jơnum min apăn bruă Khua pơ ala mơnuih ƀôn sang dêh čar hăng Khua pơ ala gơgrong bruă mơng Kơnuk kơna. Anai lĕ bruă jơnum blung a mơng Jơnum min apăn bruă Khua pơ ala mơnuih ƀôn sang dêh čar gơgrong bruă tơdơi kơ ngă giong bruă ruah khua. Khua git gai wai lăng pơ ala mơnuih ƀôn sang dêh čar ta ơi Vương Đình Huệ git gai bruă Jơnum. Pơhiăp amăng mông pok phun jơnum, Khua git gai wai lăng pơ ala mơnuih ƀôn sang dêh čar ta ơi Vương Đình Huệ lăi rơđah, amăng hră čih Tơlơi pơtrun pơsit lăi pơthâo amăng tal jơnum lok 11, Khua pơ ala mơnuih ƀôn sang tal 14 kơ bruă mă amăng rơwang bruă 2016-2021 mơng Khua pơ ala mơnuih ƀôn sang dêh čar ta, hmâo 8 bôh yôm mơ̆ Khua pơ ala mơnuih ƀôn sang dêh čar ta tal 15 kiăng ngă tui, pơhlôm Khua pơ ala mơnuih ƀôn sang sit nik jing ƀirô khua pơ ala mơnuih ƀôn sang dlông hloh mơng mơnuih ƀôn sang. Jơnum min apăn bruă Khua pơ ala mơnuih ƀôn sang dêh čar rơkâo, hmư̆ dong hơdôm tơlơi gum pơhiăp mơng ƀing khua pơ ala mơnuih ƀôn sang gơgrong bruă, gum pơhiăp kơ bruă pơplih phrâo, pơđĭ tui hloh dong anô̆ klă ñu, bôh tŭ yua bruă mă mơng Khua pơ ala mơnuih ƀôn sang. Pơ̆ anăp anai, Khua pơ ala mơnuih ƀôn sang amra pơdŏng jơlan hơdră mă bruă kiăng ngă tui Tơlơi pơtrun pơsit jơnum tal 13 mơng Ping gah. Amăng anun amra ngă tui rim akô̆ bruă pha ra, hăng tơlơi gum hrom mơng hơdôm bôh ƀirô git gai hăng hơdôm gru pơkă hrơi mông rơđah rơđông. Pơ̆ anăp anai, khua apăn bruă Khua pơ ala mơnuih ƀôn sang amra hmâo hrơi mông mă bruă rơđah rơđông hăng Khul wai lăng djuai ania, rim Jơnum min, ƀirô mơng Khua pơ ala mơnuih ƀôn sang pơdŏng kơčăo bruă, mă yua tơlơi pơtrun pơsit jơlan gah pơdŏng glông bruă tơlơi phiăn amăng rơwang bruă pơ̆ anăp./.

Siu H’ Prăk: Pô pơblang