VOV4.Jarai - Ƀrô Jơnum ruah khua Ping gah đơ đam dêh čar tal VIII mơng Ping gah Cộng sản Cuba pơphun hiam klă, Khua git gai Ping gah dêh čar ta ơi Nguyễn Phú Trọng hơmâo mông pơhiăp telephôn hăng ơi Miguel Diaz- Canel Bermudez, Khua git gai Ping gah tal sa Khul apăn bruă Ping gah Cộng sản dêh car Cuba, Khua mir sir dêh čar Cuba. Khua git gai Ping gah dêh čar ta ơi Nguyễn Phú Trọng abih pran jua pơpŭ kơ Ping gah Cộng sản Cuba hơmâo pơphun hiam klă Jơnum ruah khua Ping gah đơ đam dêh čar tal VIII; laih dong pơpŭ kơ ơi Miguel Diaz-Canel Bermudez hơmâo Ping gah Cộng sản Cuba đăo gơnang ruah ngă Khua git gai Ping gah tal sa; pơdah tơlơi đăo gơnang Ping gah Cộng sản Cuba amra tŏ tui git gai mơnuih ƀon sang Cuba găn rơgao tơnap tap, tơlơi lông, ngă pơgiong hơdôm hơnong pơkă, tơlơi pơsit yua Jơnum ruah khua Ping gah tal VIII ba tơbiă, pơjing lŏn ia Cuba xã hội chủ nghiã rơnuk rơnua hăng hơđong kjăp. Khua git gai Ping gah dêh čar ta ơi Nguyễn Phú Trọng lăi pơtŏng, Việt Nam lêng kơ lăng yôm hăng čang rơmang amra tŏ tui ngă hrŏm giang mah yôm phăn kơplah wah dua Ping gah, dua Kơnuk kơna Việt Nam - Cuba; rơkâo pơ anăp anai, dua bơnah kiăng tŏ tui gum hrŏm kjăp dong kiăng pok pơhai tŭ yua hơdôm tơlơi pơkôl dua bơnah, ba tơlơi rô nao rai kơplah wah Việt Nam - Cuba jai hrơi dơlăm, sit nik hăng hơđong kjăp.

Siu Đoan: Pơblang