VOV4.Jarai-Ơi Dương Văn Trang, ding kơna apăn bruă ping gah dêh čar, Khua git gai Ping gah tơring čar Kon Tum phrâo nao čuă hăng mă bruă tom khua mua, ling tơhan puih kơđông  pơgang guai dêh čar Amăng jang jơlan guai dêh čar hăng jar kmar Bơ Y.

Tui hăng tơlơi lăi pơthâo, amăng thun 2020 hăng klâo blan bơyan tal sa thun 2021, Puih kơđông anai hơmâo mă pơkong, tơgŭ kơđi 6 wơ̆t arăng ngă soh, 9 čô mơnuih ngă soh, pơhrui mă 13 kg hot jrao ma túy djop mơta, ngă giong hră pơar, jao mơnuih soh, gơnam ngă soh, rơdêh ƀing ngă soh kơ tơhan kông an tơring čar ĕp kơđi, čih pơgiong hră tơgŭ kơđi tui hăng tơlơi phiăn pơkă; pơsir rơbêh 130 wơ̆t tơlơi hơmâo, rơbêh 350 čô ngă soh tơlơi phiăn guai dêh čar, mut tơbiă ča čot; ngă hrom hăng tơhan djop anom bruă kơnuk kơna, ƀuh hăng mă pơkong 2 wơ̆t ngă soh, 2 čô mơnuih, djă ba 1.430 kg mlăi pơtuh djop mơta.

Khua git gai ping gah tơring čar ơi Dương Văn Trang klah čun amăng mông mă bruă, ăt pơtă kơ khua mua, ling tơhan puih kơđông pơgang guai dêh čar ƀơi amăng jang guai dêh čar hăng jar kmar Bơ Y, ngă bruă hăng tơlơi gơgrong ba prong hloh, pơphun re se, pơtrut pran jua ling tơhan mă bruă, ngă giong bruă jao; khom răng kơđiăng, tong ten, anăm lê̆ luh amăng tơlơi plư hăng ngă soh tơlơi phiăn kơnuk kơna.

Nay Jek: Pơblang