VOV4.Jarai - Mơguah lơ 19/4, ƀơi Hà Nội, Sang ia jrao Ling tơhan 108 pơphun ngă lơphet yôm hơdor glăi 70 thun gru grua hing ang hăng čơkă mă miđai Tơhan sông kơtang. Nao pơhmư̆ hơmâo Khua git gai Ping gah ơi Nguyễn Phú Trọng, Ding kơna apăn bruă Kơđi čar, Khua git gai Ping gah khul ling tơhan, ƀing khua mơng Ding jum kơđi čar, khua apăn bruă Ping gah, Ding kơna Ping gahk, ƀing khua hơđăp mơng Ping gah, Kơnuk kơna hrŏm hăng khua pơ ala kơ hơdôm Ding jum, anom bruă mơng gơnong dlông. Pơ ala kơ Ping gah, Kơnuk kơna, brơi miđai Tơhan sông kơtang kơ Sang ia jrao Ling tơhan 108, Kơ-iăng kihua dêh čar ơi Vũ Đức Đam pơsit: Ƀu kơnong hmư̆ hing amăng bruă mă đôč ôh, sang ia jrao ăt hmư̆ hing amăng bruă wai lăng rơgơi. Jing sa boh sang ia jrao ling tơhan samơ̆ ƀu kơnong pơjrao tơlơi ruă brơi ling tơhan, kơsem min, pơtô bruă ia jrao gah ling tơhan đôč ôh mơ̆ gơñu hơmâo pơtrut đĭ tơlơi gêh gal, gum djru wai lăng, pơgang ba tơlơi suaih pral kơ mơnuih ƀon sang, tui anun jai hrơi hơmâo lu tui tơlơi rơgơi mơng ia jrao gah ling tơhan. Git gai kiăng sang ia jrao pơtŏp bruă brơi khua mua kơjăp pran, kơjăp tơlơi pơmin, rơgơi mơbruă, djơ̆ hăng gru grua hing ang ƀrô ngă Ling tơhan rơnuk Wa Hồ, ƀrô ngă Ơi ia jrao hơmâo pran jua hiam.

Khua git gai Ping gah ơi Nguyễn Phú Trọng, Khua git gai Khul ling tơhan nao čuă lăng Anih gru grua Sang ia jrao Ling tơhan 108.

Siu H’Mai: Pơblang