VOV4.Jarai-Ƀơi sang bruă khua ping gah dêh čar, ơi Nguyễn Phú Trọng Khua git gai Ping gah dêh čar hơmâo tŭ jum ơi Ngụy Phượng Hòa, Ding kơna apăn bruă Kơnuk kơna dêh čar, Khua ding jum ling tơhan dêh čar Khač rai čuă jơmư Việt Nam hăng jơnum bưp nao rai giăng mah gah ling tơhan pơgang guai dêh čar Việt Nam-Khač tal 6.

 Ƀơi mông tŭ jum, ơi Nguyễn Phú Trọng bơni hơơč boh tŭ yua mơ̆ng jơnum bưp nao rai tơhan pơgang guai dêh čar Việt Nam-Khač tal 6 hăng bơnah ngă hrom ling tơhan gưl Kơ-iăng Khua ding jum ling tơhan tal 7.

Ơi Nguyễn Phú Trọng bơni hơơč kơ dêh čar Khač phrâo jơnum tŭ yua lok pă khua mua pơ ala mơnuih ƀôn sang dua gơnong bruă tal 13, pơsit akŏ bruă 5 thun tal 14;

Khua git gai ping gah dêh čar ta ăt lăng yom tơlơi pơmin mơ̆ng Ping gah, kơnuk kơna hăng mơnuih ƀôn sang Việt Nam amăng bruă ngă giăng mah yom phara, hlom bom kơplah wah Việt Nam hăng Khač, dong yua nao rai amăng tơlơi čih pioh gru đưm mơ̆ng Ping gah, kơnuk kơna hăng mơnuih ƀôn sang dua boh dêh čar; čang rơmang dua bơnah ping gah, dua boh dêh čar ăt kơtưn ngă hrom pơgang anih hơdip jum dar mơak rơnuk rơnua, ngă hrom tong ten pơpŭ nao rai boh tŭ yua kơ mơnuih ƀôn sang, yua tơlơi ngă giăng mah tong ten hrom rơnuk rơnua, hơđong, ngă hrom kjăp amăng kual hăng ƀơi rŏng lŏn tơnah.

Nay Jek: Pơblang