VOV4.Jarai - Ơi Dương Văn Trang - Ding kơna apăn bruă Ping gah, Khua git gai Ping gah tơring čar Kon Tum phrâo hơmâo mông ngă bruă hăng khua mua, ling tơhan puih kơđông tơhan pơgang guai Rơ Long (să Đăk Long, tơring glông Đăk Glei). Ƀơi mông ngă bruă, Puih kơđông tơhan pơgang guai Rơ Long rơkâo: Djŏp gưl bruă lăng ba djru pơkra ming jơlan hyu tir yua juăt hơmâo tơlơi truh lŏn tơhlŏm prong amăng bơyan hơjan jing ngă tơnap kơ bruă hyu tir; man pơkra jơlan lu črăn pơtruh nao rai jơlan ƀơi hơdôm anih hlă gŏng guai, man pơdong pơnăng, gŏng guai dêh čar; pơtrut bruă pơkra apui lơtrik; pơkra ming klă hloh amăng jang anet Đăk Long jing bah amăng jang prong bơwih kơ bruă tuai hyu ngui hăng sĭ mơdrô gơnam.

Anih pơphun jơnum

Ơi Dương Văn Trang - Khua git gai ping gah tơring čar Kon Tum pơtă hlâo, amăng mông hyu tir pơgang guai dêh čar kiăng wai pơgang glai rưng hlao mơtăm. Anom bruă git gai tơhan pơgang guai tơring čar hăng Puih kơđông tơhan Rơ Long khŏm juh alum na nao ƀing khua, ling tơhan ngă giong bruă hơmâo jao. Puih kơđông tơhan pơgang guai Đăk Long kiăng pơtruh ngă adơi ayong hăng să Đăk Long, pơphô bruă kơ să amăng bruă akŏ pơjing Ping gah, gong gai să hăng djru ba mơnuih ƀon sang thâo bơwih ƀong, pơhrŏ trun tơlơi rin rơpa hăng man pơdong plơi pla phrâo.

Siu H’Mai: Pơblang