VOV4.Jarai - Mơmot tom brơi lơ 2/4, ƀơi Sang bruă Khua pơ ala mơnuih ƀon sang dêh čar, Khua git gai pơ ala mơnuih ƀon sang dêh čar ơi Vương Đình Huệ hơmâo pơhiăp telephôn hăng Khua git gai pơ ala mơnuih ƀon sang dêh čar Lao Saysomphone Phomvihane. Hơ-ơč hmưi kơ ơi Saysomphone Phomvihan hơmâo Khua mua pơ ala mơnuih ƀon sang dêh čar Lao ruah ngă Khua git gai pơ ala mơnuih ƀon sang dêh čar Lao tal 9, Khua git gai pơ ala mơnuih ƀon sang dêh čar ơi Vương Đình Huệ pơsit, Việt Nam lăng yôm hăng djru ngă hlâo tơlơi rô nao rai yôm pơphăn hăng dêh čar Lao, lăng anai lĕ hơdră bruă yôm dưi pơsit tơlơi pơdrong asah ƀudah rin rơpa mơng dua boh dêh čar; amra djru ba khua mua, mơnuih ƀon sang dêh čar Lao akŏ pơdong lŏn ia Lao pơdrong asah.

Dua bơnah pơphun jơnum bơkơtuai kiăng kơsem min boh thâo phrâo, pơphun pơtŏp brơi tơlơi apăn bruă git gai kơ Khua mua pơ ala mơnuih ƀon sang, khua mua jơnum min pơ ala mơnuih ƀon sang tơring čar hăng khua gơgrong sa mơta bruă mơng Ƀirô khua pơ ala mơnuih ƀon sang dêh čar Lao. Dua bơnah gum pel ĕp, wai lăng, hăng pơsur ngă hrŏm gah bơwih ƀong huă, biă ñu sĭ mơdrô, tuh pơ alin, pơphun ngă tui hơdôm tơlơi pơkôl pơkă mơ̆ dua Kơnuk kơna hơmâo kĭ.

Siu H’Mai: Pơblang