VOV4.Jarai-Ơi Vương Đình Huệ, Khua git gai pơ ala mơnuih ƀôn sang dêh čar lơ 28/4 hơmâo mă bruă hăng khua mua Jơnum min Boh thâo ia rơgơi hăng anih hơdip jum dar. Khua git gai pơ ala mơnuih ƀôn sang dêh čar lăi lĕ, tui hăng tơlơi pơtrun mơ̆ng Gơnong dlông, Ping gah amăng sang bruă khua git gai pơ ala mơnuih ƀôn sang dêh čar khom pơkra hơdră či mă bruă tui Hră pơtrun jơnum ruah khua ping gah dêh čar tal XIII, Ding jum kơđi čar amra ĕp glăi boh yom phun anai amăng bơyan klâo blan tal IV thun 2021.

Khua git gai pơ ala mơnuih ƀôn sang dêh čar ơi Vương Đình Huệ đĭ pơhiăp amăng mông jơnum

 Dŏ glăi ƀơi mông jơnum lok 11, khua mua pơ ala mơnuih ƀôn sang dêh čar tal 14 hơmâo pơsit hră pơtrun, amăng anun jao kơ khua mua pơ ala mơnuih ƀôn sang dêh čar 8 khul bruă kiăng pơđĭ tui hloh bruă mă mơ̆ng khua mua pơ ala mơnuih ƀôn sang dêh čar.

Anai lĕ bruă mă tal 10 mơ̆ng khua mua git gai pơ ala mơnuih ƀôn sang dêh čar hăng djop Jơnum min amăng anom bruă khua pơ ala dêh čar. Boh tơhnal sang bruă khua pơ ala mơnuih ƀôn sang dêh čar dưi ngă amăng 75 thun rơgao laih anun boh nik ñu tal XIV prong biă mă, samơ̆, rơgao hơdôm wơ̆t mă bruă ăt brơi ƀuh, ăt dŏ lu bruă kiăng bơblih phrâo hăng pơđĭ tui boh tŭ yua kơ khua mua pơ ala mơnuih ƀôn sang mă bruă pơ anăp anai. Khua git gai pơ ala mơnuih ƀôn sang dêh čar ơi Vương Đình Huệ pơtrun hiăp, Jơnum min Boh thâo ia rơgơi hăng anih hơdip jum dar khom pơkra hơdră ăt bơblih phrâo pơđĭ tui boh tŭ yua amăng bruă mă djop jơnum min kơ anom bruă khua pơ ala mơnuih ƀôn sang dêh čar tal XV, kiăo tui atur hơmâo laih hlâo kơ bruă čih pơkra tơlơi phiăn, krăo lăng hăng pơsit bruă mă yom kơ dêh čar.