VOV4.Jarai-Ngă tui hơdră nao bưp mơnuih plĕ hră hlâo kơ ruah khua tui Tơlơi phiăn Ruah khua pơ ala mơnuih ƀôn sang dêh čar hăng ƀing pơ ala mơnuih ƀôn sang djop gưl, tom brơi, lơ 9/5, Khua git gai pơ ala mơnuih ƀôn sang ơi Vương Đình Huệ nao bưp mơnuih plĕ hră ƀơi tơring glông Vĩnh Bảo, An Lão ƀôn prong Hải Phòng pioh lăi pơthâo hơdră mă bruă mơ̆ng ñu hăng mơnuih ƀôn sang plĕ hră.

Ƀơi mông bưp, Khua git gai pơ ala mơnuih ƀôn sang dêh čar lăi lĕ, bruă mă čih pơkra tơlơi phiăn dêh čar khom pơđing hmư̆ tơlơi pơgôp hiăp mơ̆ng mơnuih ƀôn sang, jơlan hơdră tơlơi phiăn pơtrun khom djơ̆ pran ană plơi. Tơdah dŏ čih pơkra tơlơi phiăn amăng anih mă bruă rơ-ơ̆ rơ-iom pioh ngă hră pơtrun, amra ƀu jĕ giăm ană plơi, ƀu pơđing hmư̆ mơnuih ƀôn sang kiăng hơgĕt, ƀu lăng nao bruă mă sit nik amăng tơlơi hơdip mơda hiư̆m pă ôh.

Bruă man pơdong plơi pla phrâo, Khua git gai pơ ala mơnuih ƀôn sang brơi thâo, pơ anăp anai, amra ngă hră pơtrun tơhnal pơkă mơ̆ng thun 2021-2025. Him lăng jơnum lok 2 khua mua pơ ala mơnuih ƀôn sang dêh čar tal XV amra jơnum kơ tơlơi anai, boh nik ñu tơhnal pơkă, ngă hră pơtrun hnong ngă hrom tơdơi kơ anun pơpha bruă mă kơ djop tơring čar ngă tui.

Nay Jek: Pơblang