VOV4.Jarai - Mơguah lơ 11/4, ƀơi tơring čar Nghệ An, Khua git gai wai lăng pơ ala mơnuih ƀôn sang dêh čar ta ơi Vương Đình Huệ nao pơhmư̆ mông ngă lơphet čơkă Tơlơi pơsit mơng Ding jum ia jrao tŭ yap Sang ia jrao giăng mah prong Nghệ An lĕ sang ia jrao gah glông rơnuč kơ bruă pel ĕp, pơjrao tơlơi ruă kual Pơngŏ Tŏng krah dêh čar. Nao pơhmư̆ hrom hmâo Khua ding jum ia jrao dêh čar ơi Nguyễn Thanh Long hăng Khua mua git gai Ping gah, Kơnuk kơna. Pơhiăp amăng mông ngă lơphet, Khua ding jum ia jrao dêh čar ơi Nguyễn Thanh Long lăi lĕ, bruă jao tơlơi pơsit tŭ yap hăng jao bruă sang ia jrao glông rơnuč bruă pel ĕp, pơjrao tơlơi ruă kual Pơngŏ Tŏng krah dêh čar kơ Sang ia jrao giăng mah prong tơring čar Nghệ An lĕ bôh tơhnal yôm phăn mơng tơring čar kiăng anăp nao ngă tui truh kih Tơlơi pơtrun pơsit mrô 26 mơng Ding jum kơđi čar hăng Tơlơi pơtrun pơsit Jơnum Ping gah tơring čar Nghệ An tal 19 hmâo ba tơbiă. Ƀrô djơ̆ tal anai, Khua git gai wai lăng pơ ala mơnuih ƀôn sang dêh čar ta ơi Vương Đình Huệ hmâo ƀơk brơi dua bôh măi suă jua yôm kơ Sang ia jrao prong giăng mah Nghệ An./.

Siu H’ Prăk: Pô pơblang