VOV4.Jarai - Tơdơi kơ pơđut hơdôm bruă bưp mơnuih ƀôn sang, čơtlăm tom brơi lơ 11/5, Khua git gai wai lăng pơ ala mơnuih ƀôn sang dêh čar ta ơi Vương Đình Huệ hmâo mông mă bruă  hăng Grŭp apăn bruă Ping gah ƀôn prong Hải Phòng kơ bruă prăp lui ruah khua hăng bôh tơhnal ngă tui bruă mă 4 blan akô̆ thun.

Pơhiăp amăng mông mă bruă, Khua git gai wai lăng pơ ala mơnuih ƀôn sang dêh čar ta ơi Vương Đình Huệ lăi lĕ, ƀôn prong Hải Phòng hmâo prăp lui klă laih bruă ruah khua pơ ala mơnuih ƀôn sang dêh čar ta tal 15 hăng khua pơ ala Khul pơ ala mơnuih ƀôn sang hơdôm gưl rơwang bruă 2021-2026. Hải Phòng pơđut bruă pơphun brơi 15 čô mơnuih tơbiă anăn bưp mơnuih ruah khua ƀơi 3 bôh anom ruah khua kiăng pơsur ruah khua, hơdră ngă tŏng ten, hmâo akô̆ tlôn, tơpă, pơčeh phrâo, pơkĕ hrom ƀơi anăp hăng lăng nao rai amăng tivi truh abih bang hơdôm bôh să, phường, tơring kual; pôr tơlơi pơhiăp tui tlôn, tui glông internet. Hơdră ngă anai ba glăi bôh tơhnal biă, amăng anun hmâo tôm hơdôm kual plơi pla amăng ƀôn prong. Drơi pô ƀing tơbiă anăn ăt ƀuh hơđong pran jua mơn lom hơdôm jơlan hơdră pơsur, gum pơhiăp mơng pô dưi pôr hyu truh mơnuih ruah khua hăng djop gưl mơnuih ƀôn sang. Biă ñu, ƀôn prong Hải Phòng ngă klă bruă pơgang, pơgăn klin Covid-19, ră anai wai lăng klă tơlơi, ƀu pioh lar tưp hyu klin ruă./.

Siu H’ Prăk: Pô pơblang